Ձեր վստահելի աղբյուրը

Հանրապետականը պատգամավորներից որևէ մեկի հեռանալը ցավագին չի տանում: ԱԺ-ում  լրագրողների հետ զրույցում այսօր այս մասին ասաց ՀՀԿ խմբակցության ղեկավար Վահրամ Բաղդասարյանը՝ խոսելով ՀՀԿ խմբակցությունից դուրս եկած պատգամավորների մասին։

Վերջինս ուշադրություն հրավիրեց այն հանգամանքի վրա, որ աշխարհում նման երևույթ չի եղել, երբ իշխանություն դառնա մի քաղաքան ուժ, ԱԺ-ում մեծամասնություն լինի մեկ այլ ուժ։

«Սա խոսում է Հանրապետականի միասնականության մասին, որը մենք նորմալ ենք համարում», - նկատեց Բաղդասարյանը։

ՀՀԿ-ական գործիչը շեշտեց, որ իրենք որևէ մեկից կառչած չեն, և յուրաքանչյուրն ազատ է հեռանալ։

«Ֆելքիս Ցոլակյանն ինքն է խնդրել, որ մնա խմբակցությունում։ Մենք նրան հորդորել ենք, որ եթե կլինեն կրկնություններ,այսինքն՝ ոչ համահունչ մեր քաղաքական որոշումներին, մենք այդ հարցը կվերանայենք, և ինքը մտածել է, որ ավելի լավ է գնա, դիմում գրի։ Ցոլակյանն արդեն իսկ ամսի 1-ից խմբակցության անդամ էր սիրողական մակարդակով, իսկ ինչ վերաբերում է Շիրակ Թորոսյանին, նա չի հեռացրել, մենք հեռացրել ենք նրան: Ամսի 29- ին հեռացվել է, ամսի 30-ին՝ դիմում ներկայացրել», - նշեց Բաղդասարյանը։

Հարցին՝ ի վերջո քանի պատգամավոր կմնա ՀՀԿ խմբակցությունում, վերջինս նշեց. «Եթե մենք շատ չստիպենք, որ գնան, 54 հոգի կմնա»։