Ձեր վստահելի աղբյուրը

Վերջերս բնակիչներից այնքան «հրահրեցին», որ էլի հիշեցինք «Վեոլիայի»  մասին:  Նախ՝ բողոքներ, որ  հայտարարված համայնքների չհայտարարված փողոցներում ևս ջուրը կտրում են: Միգուցե ընդհանրապե՞ս չհայտարարվել, մարդիկ  զինված լինեն ու պաշտպանված ջրազրկումից:

Սա՝ նախ:
Հետո:
Մի քանի օր առաջ, գիտեք, լողավազանում 13 հոգի թունավորվել էին քլորից ու տեղափոխվել հիվանդանոց: Սա ստիպեց մեզ լրջանալ ու պաշտոնական աչքով նայել խմելու ջրին:

Կազմեցինք մի քանի թեթև  հարց, որ «Վեոլան» պիտի անգիր իմանար,  և այո՝ հենց այսօր էլ ընկերությունից ստացանք պատասխաններ: Միայն թե՝  ոչ մենք տված լինեինք, ոչ իրենք՝ պատասխանած….

Panorama.am.-  Դուք անընդհատ թղթիկներ եք թողնում դռներին, որ բնակիչները իրենց ջրաչափերի նկարները ուղարկեն «վայբերով»: Այդ  ՁԵՐ մեթոդը իրեն արդարացնո՞ւմ է: Չե՞ք մտածել, որ կարելի է ասենք քսան նկար անել ամեն օր ու ամեն ամիս մեկը ուղարկել:
Veolia Ջուր. - Ջրաչափական սարքի ցուցմունքը գրանցվում է ձեզ սպասարկող մասնագետ-տեսուչի կողմից՝ Տեխնիկական սարքի միջոցով նկարելու եղանակով նվազագույնը տարեկան 2 անգամ (գործնականում՝ որպես կանոն 2 ամիսը մեկ): Ցավոք, երբ բաժանորդին այցելության ընթացում ինչ-ինչ պատճառներով (տանը մարդ չկա, կամ միայն երեխաներ են կամ էլ մեծահասակներ, երբեմն էլ պարզապես դուռը բաց չեն անում) հնարավոր չի լինում գրանցել ցուցմունքը, Վեոլիա ջուր ՓԲԸ տեղամասային մասնագետ-տեսուչների կողմից երբեմն կիրառվում է նաև ջրաչափերի ցուցմունքի հաղորդման նշված մեթոդը որպես լրացուցիչ միջոց:Սակայն բաժանորդն էլ կարող է, չսպասելով նրա այցին, հնարավոր թյուրիմացություններից խուսափելու համար ամեն ամիս ջրաչափի ցուցմունքը հաղորդել Veolia Ջուր ՓԲԸ հետեւյալ կերպ (սրան հետևում են հեռախոսահամար, էլփոստ, գրանցում կայքում-խմբ.):
Եզրակացություն.- Նկատենք, որ ընկերությունը ընդհանրապես հաշվի չի առել, որ կլինեն բնակիչներ, ովքեր չեն եռում անպայման վճարելու փափագով…:  ՈՒ զարմանալի է, որ էլհաշվիչների, գազի հաշվիչների օրինակները աչքի առաջ, Veolia Ջուրը չի անցնում բնակարանից դուրս ևս ջրաչափերի տեղադրմանը, ինչը կհեշտացներ «ինչ-ինչ պատճառների» ստեղծած անհնարինությունը:Այստեղ չմոռանանք նաև միայնակ ապրող ծերերին՝  իրենց հեռախոսների տեխնիկական հնարավորություններով:

Panorama.am.-  Եթե բնակիչը ծորակի ջրից շատ ուժեղ քլորահոտ է զգում, խմի՞, թե՞ չէ, ինչ խորհուրդ կտաք:
Veolia Ջուր. - Հայաստանյան ջրի բարձր որակը հայտնի է բոլորին: Սակայն միևնույն է, աղբյուրում այն պարտադիր կերպով քլորացվում է՝ կանխարգելիչ նկատառումներով: Սա հանընդհանուր, ողջ աշխարհում ընդունված որակի ապահովմանն ուղղված տեխնոլոգիա է:

Սպառողին մատակարարվող 1 խոր. դեցիմետր ջրին տրվում է 0,3-0,5 մլգ քլոր, որը միանգամայն անվտանգ է սպառողների առողջության համար: Իսկ քլորի առկայությունը ջրում ենթադրում է նաև քլորի որոշակի հոտ (եթե խոսքն իրոք քլորի հոտի մասին է): Այնպես որ դա միանգամայն նորմալ է և վկայում է ջրի անվտանգ լինելը, հետևաբար չպետք է անհանգստացնի սպառողներին:

Այստեղ նաեւ կարեւոր է ջրից օգտվելու մշակույթը: Չի կարելի ծորակը բացելուց անմիջապես հետո ջուր վերցնել, պետք է մի պահ սպասել, մինչեւ խողովակի մեջ ժամերով կանգնած ջուրը արտահոսի: Սպառողներին նաեւ անհանգստացնում է «գազավորված» ջուրը, երբ վերջինիս մեջ օդի պղպջակներ են լինում: Դա ջրի բարձր ճնշումից է, բայց ոչ քլորացումից:

Այնուամենայնիվ, ջրի ոչ գերքլորացված լինելու վերաբերյալ իրենց կասկածը փարատելու համար սպառողները կարող են ահազանգել վերը նշված կապի միջոցներով:
Եզրակացություն – Փաստորեն՝ ընկերությունը խոսում է ջուրը ծորացնելու (ի դեպ՝ դա էլ փող արժե) մշակույթից, բայց երբևէ, ԵՐԲԵՎԷ, սեփական նախաձեռնությամբ ջրառ ու որակի ստուգումների մշակույթ ասենք չի կիրառել: Քլորի «որոշակի» հոտի մասին «նորմալության» հավաստումները թերևս հիշեցրեցին Բուլգակովին. Երկրորդ թարմության ձուկ չի լինում, ձուկը լինում է միայն առաջին թարմության: Այնպես որ՝ եթե ջրից հոտ է գալիս, ապա պիտի ասել, որ այն գուցե մաքուր է, բայց արդեն խմելու չէ: Դպրոցականն անգամ գիտե, որ ջուրը անգույն, ԱՆՀՈՏ հեղուկ է:

Ի դեպ՝ գույնի մասին՝ ամեն ջուր կտրելուց հետո այն ծորակներից գալիս է մուգ միզագույնով:  Կարող է սա էլ է նորմա, սակայն ասենք՝ նորմալ չէ:

Panorama.am .-  Որտեղ կարելի է ջրի փորձաքննություն պատվիրել:
Veolia Ջուր.-  Մենք երաշխավորում ենք մատակարարվող ջրի բարձր որակը ու պատրաստ ենք անհրաժեշտության դեպքում այն ստուգել, բայց փորձաքննության ծառայություն չենք մատուցում:
Եզրակացություն. Veolia Ջուրը եզրակացություններ չի անում բազմաթիվ բնակիչների  բողոքներից: Ընդ որում՝ բարձր որակի բողոքներից:

Panorama.am.-  Խնդրում ենք տրամադրել ջրի բաղադրության ստանդարտները՝  հրապարակելու համար (խոսքը իհարկե H2O-ի մասին չէ):
Veolia Ջուր.-  Հարցը տեխնիկական առումով կոռեկտ չի ձեւակերպված: Ամեն աղբյուր ունի իր բաղադրությունը: ՀՀ Բնապահպանության նախարարության կողմից Վեոլիա Ջրի շահագործմանը հանձնված բոլոր աղբյուրները տալիս են Հայաստանում գործող սանիտարական նորմերին ու կանոններին համապատասխանող ջուր:

Ուրեմն այսպես՝  այդ դուք չեք կոռեկտ պատրաստված: Ինչ է նշանակում «ամեն աղբյուր ունի իր բաղադրությունը»: Ոնց որ ես դիմեմ արյան լաբորատորիա, խնդրեմ՝ տվեք արյան բաղադրության ստանդարտները, իրենք պատասխանեն՝ կոռեկտ չի, ամեն մարդ արյան իր բաղադրությունը ունի: Veolia Ջուր, դուք երբևէ արյան անալիզ հանձնե՞լ եք: Թղթի վրա նորմատիվ ստանդարտները տեսել եք: Պատիվ ունեք ձեզ ուսուցանելու, որ նման ստանդարտներ  ունի նաև խմելու ջուրը:

Ու քանի որ, ինչպես հասկանում ենք՝  Հայաստանում ջուրը չունի թույլատրելի ստանդարտներ, մենք ձեզ օրինակ ենք բերում Ռուսաստանի, Եվրոպայի, ԱՄՆ-ի ստանդարտները՝ ռուսերեն լեզվով, քանի որ դրանք «թափած» են ինտերնետում:

Ի դեպ՝ ինքս մեր ծորակից եկող ջուրը տալու եմ փորձաքննության: ՈՒ եթե պարզվի, որ թեկուզ միայն  քլորի բաղադրությունը բարձր է (իսկ ես տարբերում եմ հոտը պղպջակից), քաղաքի բոլոր ինֆեկցիոն հիվանդությունների ծախսերը ընկերությունից եմ գանձելու:

Ու եթե Երևանի ջրի մասին դեռ խոսում եմ «փորձաքննության» լեզվով, Դիլիջանի ջուրը փորձաքննություն չի էլ ուզում: Հիմնական նկարը՝  Հասմիկ Սողոմոնյանի ֆեյսբուքյան էջից՝ Դիլիջանի «բարձր որակի, բոլորին հայտնի» ջուրը՝ թարմ-թարմ, հատուկ ջուր ապահովող ընկերության համար:
 

Անահիտ Ոսկանյան

Խմելու ջրի ստանդարտների աղյուսակ