Ձեր վստահելի աղբյուրը

Տնտեսագետ Վահագն Խաչատրյանը կարծում է, որ կառավարությունը պետք է լայնածավալ գործողություններ իրականացնի  կոռուպցիայի և ստվերային տնտեսության դեմ, քանի որ ցանկացած բնագավառում կոռուպցիոն երևույթներ կլինեն։ 

Այսօր «Հոդված 3» մամուլի ակումբում լրագրողների հետ հանդիպման ժամանակ անդրադառնալով ԱԱԾ-ի կողմից վերջերս սուպերմարկետներում բացահայտած հարկերից խուսափելու կոռուպցիոն սխեմաներին, տնտեսագետն ասաց՝ պարզվում է, որ դա կատարվում է ոչ միայն գործարարների կողմից, այլև հենց օրենքներում կոռուպցիոն ռիսկեր կան։

«Այսինքն՝ եղել է արատավոր մի գործընթաց. ստեղծում են օրենք, այն շրջանցելու մեխանիզմ, հետո գտնում են մարդկանց ու ասում՝ օրենքը շրջանցելով աշխատեք»,- ասաց տնտեսագետը։

Վահագն Խաչատրյանի խոսքով՝  հաջորդ քայլը, որով պետք է կառավարությունը զբաղվի, փոքր բիզնեսն է, քանի որ փոքր բիզնեսով զբաղվողները հիմա հայտնվել են ոչ միայն անհավասար պայմաններում, այլև զարմանալի է, որ մինչ օրս կարողանում են գոյատևել:

Տնտեսագետը նշեց, որ կառավարության տեղը լիներ՝ անմիջապես կլուծարեր Տնտեսական մրցակցության պաշտպանության պետական հանձնաժողովը, քանի որ դրա արդյունավետությունը չի տեսնում. «Միայն կարող եմ ասել, որ տարեկան 400 միլիոն դրամ այդ հանձնաժողովը ծախսում է պահպանման համար»։ 

Տնտեսական մեկնաբան, b4b.am կայքի հիմնադիր Բաբկեն Թունյանն անդրադառնալով ԱԱԾ բացահայտումներին, նշեց, որ դրանք իրականում այդքան էլ բացահայտում չեն, քանի որ այդ նույն խանութները բոլորին էին հայտնի, պարզապես պետք է ընդլայնել շրջանակները և մտնել բոլոր ոլորտները։

«Ինձ համար բացահայտումը կլինի այն, որ մենք տեսնենք այնպիսի բաներ, որոնց մասին չգիտեինք։ Համոզված եմ, որ այդպիսի բաներ շատ կլինեն»,- ասաց Բաբկեն Թունյանը։

Նրա խոսքով՝ պետք է ոչ միայն կենտրոնանալ ներմուծման և առևտրի ոլորտների վրա, այլև աշխատանքներ տանել այլ ոլորտներում, օրինակ, պետական գնումների ոլորտում։ Նա նաև ասաց, որ խտրականություն չպետք է դրվի, թե բիզնեսը ում է պատկանում, կամ պաշտոնյան որ քաղաքական թևն է ներկայացնում և ինչ կապեր ունի։

«Այսինքն, եթե ստուգում են Սամվել Ալեքսանյանի բիզնեսները, նույն կերպ պետք է բոլոր օլիգարխ պատգամավորների, ընդհանրապես բոլորի բիզնեսներում պետք է ուսումնասիրություն կատարվի։ Դա կարևոր է նրա համար, որ ոչ միայն կոռուպցիոն ստվերային մեխանիզմները մաքրվեն, այլև պատկերացնենք մեր տնտեսության իրական պատկերը»,- նշեց Բաբկեն Թունյանը։