Ձեր վստահելի աղբյուրը

Կառավարության ծրագիրը պետք է ունենա կոմպոնենտներ, որոնք կարտացոլեն այսօրվա քաղաքական իրողությունները: ԱԺ-ում լրագրողների հետ զրույցում այսօր այս մասին ասաց Աշխատանքի և սոցիալական հարցերի նախարար Մանե Թանդիլյանը:

«Այո, ծրագիրն ունի տնտեսական ուղենիշեր և տեսլական, որոնք ակնհայտ ու ֆիքսված են: Հստակ են պատկերացումները, թե ինչ ենք անելու՝ ելնելով այդ փաստաթղթից»,- ասաց նա:

Մանե Թանդիլյանը նշեց, որ պաշտոնավարման երկու շաբաթների ընթացքում փորձել է խորամուխ լինել քաղաքացիներին անհանգստություն պատճառող դրույթների մեջ, ինչն իր համար ելակետ է լինելու: Հասարակությանն առավելապես անհանգստացնող երևույթներից նախարարն առանձնացրեց արդարության վերականգնման անհրաժեշտությունը, օրինակ բժշկասոցիալական փորձաքննության բնագավառում:

«Ես իսկապես շատ կցանկանամ, որ հասկանանք՝ մեր նախարարությունն աշխատանքի նախարարություն է: Այս առումով մեծ աշխատանք կա անելու»,- ասաց Թանդիլյանը:

Անդրադառնալով կուտակային կենսաթոշակների պարտադիր բաղադրիչին՝ աշխատանքի և սոցիալական հարցերի նախարարը նշեց, որ ընթանում են ինտենսիվ քննարկումներ:

«Մենք մտադիր ենք այնպիսի համակարգ ներդնել, որը հետաձգման կարիք այլևս չունենա: Պետք է այնպիսի մոտեցումներ մշակենք, որ ընդունելի լինեն հանրությանը: Ներդրման ժամանակվա ընթացքում առկա դժգոհությունները շարունակում են մնալ բայց լուծումներ կան: Ռիսկային որոշակի հանգամանքներ կան, բայց հենց դրա համար են քննարկումները: Պետք է լինի այնպիսի համակարգ, որը ցանկալի կլինի»,- շեշտեց նախարարը:

Գործադիրի ներկայացուցիչը միաժամանակ նկատեց, որ պարտադիր կենսաթոշակայինի՝ Հայաստանում ներդրված տարբերակն իրականում ամենավատը չէ:

Անդրադառնալով ոլորտային չարաշահումների նպատակով ԱԱԾ-ի հետ համագործակցությանը՝ նախարարը նշեց, որ փոխգործակցությունն ընթացքի մեջ է: Մասնավորապես, բազմաթիվ քաղաքացիներ շարունակում են ինտենսիվորեն ահազանգել նախարարություն և հայտնել բազմաթիվ խախտումների մասին: Մանե Թանդիլյանը նկատեց, որ ինքը քաղաքացիներին բազմիցս հորդորել է հասցեականություն ապահովել, անուններ տալ:

Ինչ վերաբերում է հնչող տեսակետերին, որ կառավարության ծրագիրն ավելի շուտ կենացների շարան է հիշեցնում, նախարարը հորդորեց հիշել նախկին իշխանության բարձրաձայնած թվերն ու իրական պատկերը:

«ՀՀԿ-ական պատգամավորների քննադատությունը հետաքրքիր է լսել: Ցուցանիշները, որոնք շեշտվում են և չեն կատարվում, ավելի վատ են, քան որոշումը, թե ինչպիսին պետք է լինի ելման կետը: Գրել ենք այն, ինչ ժողովուրդն ակնկալում է մեզնից»,- ասաց Մանե Թանդիլյանը: