Ձեր վստահելի աղբյուրը

ՊԵԿ փոխնախագահ Ռաֆիկ Մաշադյանը հրավիրվել է ԱԱԾ և հարցաքննվել է: Այս մասին այսօր լրագրողների հետ ճեպազրուցյում ասաց Պետական եկամուտների կոմիտեի նախագահ Դավիթ Անանյանը:

Նրա խոսքով՝ դա բնականոն գործընթաց է. «Պետական պաշտոնյան ԶԼՄ-ների հետ ճեպազրույցի ժամանակ հայտնել է որոշ տեղեկատվություն, որի վերաբերյալ տվել է բացատրություն: Ավելին, ես էլ նախորդ անգամ ձեզ հետ ճեպազրույցում «Նորֆոլկին» վերաբերող որոշակի տեղեկատվություն եմ ներկայացրել, ԱԱԾ-ն գրավոր դիմել է ինձ, խնդրել է որոշակի պարզաբանումներ ներկայացնել, ես էլ այսօր գրավոր ներկայացնելու եմ այդ տեղեկատվությունը»:

Լրագրողները հետաքրքրվեցին, թե Ռաֆիկ Մաշադյանն ինչ է ասել ԱԱԾ-ում, Դավիթ Անանյանն ասաց,  ինքը ինչպես կարո՞ղ էր տեղյակ լինել, թե ինչ է ասել նա հարցաքննության ժամանակ:

«Երբ իմ տեղակալն ասել է, որ նախկինում եղել է նման պայմանավորվածություն, ինքը նկատի է ունեցել՝ ՊԵԿ-ում քննարկումների ժամանակ տնտեսվարողների հետ ձեռք է բերվել պայմանավորվածություն, որ ՀԴՄ-ներով գյուղմթերքների վաճառք հնարավոր է իրականացնել: Հիմա գյուղմթերքների մասով ՀԴՄ-ով շրջանառության հարկ վճարող անհատ ձեռնարկատերի միջոցով կատարված այդ գործողությունների վերաբերյալ դեռ որոշում չկա, թե ինչպես պետք է վարվենք, քննությունը շարունակվում է»,- նշեց Դավիթ Անանյանը:

Նա միժամանակ ասաց, որ իրենք իրենց գործն են անում: Մասնավորապես, այն 11 տնտեսվարողները, որոնք գյուղմթերք չհանդիսացող ապրանքները ևս այն նույն մեխանիզմով իրացրել են, հիմա այդ շրջանառության ծավալներն են մշակում. «Բոլորին  հրավիրելու ենք, հատ-հատ հաշվարկներ ենք իրականացնելու, և չվճարված հարկերը պետք է վճարել պետական բյուջե»: