Ձեր վստահելի աղբյուրը

Ինեկոբանկը հայտարարում է 5,25% տարեկան եկամտաբերությամբ դոլարային անվանական արժեկտրոնային 5 միլիոն ԱՄՆ դոլար ծավալով պարտատոմսերի առաջին տրանշի թողարկման մասին։

Պարտատոմսերի տեղաբաշխումը իրականացվելու է սույն թվականի հունիսի 11-ին՝ ժամը 10։00-ից մինչև սեպտեմբերի 11-ը՝ ժամը 16։30-ն ընկած ժամանակահատվածում, այն կատարվելու է բաց բաժանորդագրության միջոցով:   

«Պարտատոմսը ցանկացած պահի հնարավոր է վաճառել երկրորդային շուկայում և, ի տարբերություն ավանդի, որի դեպքում ժամկետից շուտ մարումը ենթադրում է կուտակված տոկոսների վերահաշվարկ, պահպանել ընթացիկ եկամտաբերությունը։ Ներդրողները, մինչև պարտատոմսերի մարումը, հնարավորություն ունեն, ընթացիկ շուկայական գներով դրանք վաճառել Մարքետ մեյքերին։ Մարքեթ մեյքերը ֆինանսական կազմակերպություն է, որը պարտավորվում է ապահովել պարտատոմսի առքն ու վաճառքը պարտատոմսի շրջանառության ամբողջ ընթացքում։ Պետք է ընդգծեմ, որ հաճախորդները կարող են չանհանգստանալ ներդրման ապահովության մասին. հարկման և երաշխավորվածության տեսանկյունից պարտատոմսերը ոչնչով չեն տարբերվում ավանդներից», - նշում է Ինեկոբանկի Ֆինանսական տնօրեն Հայկ Ոսկանյանը։

«Առաջին տրանշի շրջանակում նախատեսում ենք իրականացնել 50000 հատ պարտատոմսի տեղաբաշխում, յուրաքանչյուրը 100 ԱՄՆ դոլար անվանական արժեքով։ Պարտատոմսերի շրջանառության ժամկետը 3 տարի է, իսկ արժեկտրոնային եկամտի վճարումն իրականցվելու է կիսամյակային պարբերականությամբ։ Սա Ինեկոբանկի կողմից կապիտալի շուկա մուտք գործելու առաջին քայլն է։ Հետագայում բանկը կլինի էլ ավելի ակտիվ»,-շարունակում է նա. «Ծրագրային ազդագրով» նախատեսվում է ևս 15 միլիոն ԱՄՆ դոլարի և մինչև 2,5 մլրդ ՀՀ դրամի թողարկումներ իրականացնել»։

Տեղաբաշխման ավարտից հետո պարտատոմսերը կցուցակվեն «ՆԱՍԴԱՔ ՕԷՄԷՔՍ Արմենիա»  կորպորատիվ պարտատոմսերի բորսայական հարթակում:

Ծրագրային ազդագրի և Թողարկման վերջնական պայմանների էլեկտրոնային տարբերակները տեղադրված են «Ինեկոբանկ»  ՓԲԸ-ի պաշտոնական ինտերնետային կայքէջում, իսկ թղթային տարբերակները ներդրողները կարող են ձեռք բերել՝ այցելելով «Ինեկոբանկ»  ՓԲԸ-ի Գլխամասային գրասենյակ ք.Երևան, Թումանյան 17 հասցեով:

Ինեկոբանկի մասին

«Ինեկոբանկ» ՓԲԸ-ն, հանդիսանալով Հարավային Կովկասի առաջատար բանկերից մեկը, մատուցում է  կոմերցիոն բանկային, ինչպես նաև թվային բանկային ծառայություններ անհատներին, փոքր և միջին ձեռնարկություններին և խոշոր կազմակերպություններին։

Շուրջ 22 տարի Բանկը մատուցում է բարձրորակ բանկային ծառայություններ Հայաստանում՝ սպասարկելով ավելի քան 400,000 հաճախորդի, որոնցից մոտ 100 000-ին` թվային ուղիներով:
Իր գործունեության ընթացքում բանկը մշակել և մատուցել է ոլորտի առաջատար թվային բանկային լուծումներ՝ նպատակ ունենալով ներդնել ամբողջովին նոր բանկային ծառայություններ։

• 2009թ.-ին առաջինը Հայաստանում ներդրեց «Ապառիկ տեղում» թվայնացված և ամբողջովին ավտոմատաված ծրագիրը, որն ապրանքի ապառիկ գնման գործընթացը 3-4 օրից կրճատեց մինչև մի քանի րոպեի։

• 2012թ.-ին իր InecoOnline համակարգի շնորհիվ առաջիններից մեկն էր, որն ապահովեց գործարքների կատարումը 24/7 ռեժիմով:

• 2014թ.-ին ներդրեց InecoMobile բջջային հավելվածն, որն իր հնարավորությունների և օգտագործման պարզության շնորհիվ այսօր ունի ամենաշատ օգտատերերը հայաստանյան ֆինանսական հավելվածների շարքում։

• 2017թ.-ին բանկը առաջինն էր, որ ներդրեց ամբողջովին ավտոմատացված վարկավորման գործընթաց իր օնլայն և մոբայլ հավելվածների միջոցով: Արդյունքում վարկերը տրամադրվում են հաճախորդներին 24/7 ռեժիմով: