Ձեր վստահելի աղբյուրը

Գործադիրի այսօրվա նիստում  վարչապետ Նիկոլ Փաշինյանը էներգետիկ ենթակառուցվածքների և բնական պաշարների նախարար Արթուր Գրիգորյանին հանձնարարեց ներկայացնել, թե էլեկտրաէներգիայի և գազի սակագների փոփոխման վերաբերյալ քննարկումներն ինչ արդյունք են տվել:

Նախարարն ասաց, որ քննարկումներ են իրականացվել բոլոր շահագրգիռ կողմերի հետ, էլեկտրաէներգիայի սակագնի վերանայման հետ կապված գնահատվել են էներգետիկ ոլորտի ռիսկերն ու հնարավորությունները:

«Այս պահին էլեկտրաէներգիայի սակագնի  վերանայման հետ կապված ունենք մի շարք ռիսկեր, որոնք չենք կարող հաշվի չառնել: Ռիսկերը հիմնականում պայմանավորված են Մեծամորի ատոմակայանի երկարաձգման  աշխատանքների հետ: Պատմության մեջ չի եղել, որ ատոմակայանը այս կարգով կանգնի: Ռիսկեր կան ժամկետից ուշ վերագործարկման վերաբերյալ, այդ առումով դա սակագնի վրա կարող է մեծ ազդեցություն ունենալ: Ռիսկը հաշվի առնելով՝ այս պահին չենք ուզում գնալ այդ քայլին»,- հայտարարեց էներգետիկայի և բնական պաշարների նախարարը:

Արթուր Գրիգորյանը նաև հայտնեց, որ կան գազի գնի հետ կապված ռիսկեր. «Մենք մինչև այս տարվա վերջ Ռուսաստանի հետ ունենք պայմանավորվածություն, որ սահմանի վրա 150 դոլարով ենք ներմուծելու գազը, և դրանից հետո պետք է վերանայենք: Կա ռիսկ նաև դոլար-դրամ հարաբերակցության հետ կապված»:

Նրա խոսքով՝ տարեվերջին կգնահատեն էներգետիկ համակարգի հնարավորությունները, ուստի հաշվի առնելով այս բոլոր ռիսկերը, գտնում են, որ կարող են սակագների հետ կապված փոփոխություններ իրականացնել անապահով ընտանիքների մասով, որոնց թիվը 110-120 հազար է:

«Մեր հաշվարկներով եկել ենք եզրահանգման, որ ունենք հնարավորություն 10 դրամի չափով նվազեցնել անապահով ընտանիքներին տրվող էրելտրաէներգիայի սակագինը: Մենք ունենք երկու տարբերակ, առաջին՝ սակագնի նվազումը իրականացնենք ՀԾԿՀ-ի հետ միասին, երկրորդ՝ բանակցությունների արդյունքում ՀԷՑ-ի սեփականատեր «Տաշիր» ընկերության հետ պայմանավորվածություն է ձեռք բերվել, որ իրենք իրենց շահույթի հաշվին նվազեցնեն 10 դրամի չափով: Եթե երկրորդ տարբերակն ենք անում, հարկերը չեն նվազում»,-ասաց Արթուր Գրիգորյանը:

Վարչապետ Նիկոլ Փաշինյանն արձագանքեց. «Այնքան ռիսկերի մասին խոսեցիք, բայց  չասացիք, կոռուպցիոն ռիսկեր այդ ոլորտում ունե՞նք, թե չունենք, չարաշահումների ռիսկեր ունե՞նք, թե չունենք: Ես առաջարկում եմ, որ դուք շարունակեք ուսումնասիրությունը, առաջիկայում զեկուցեք: Այդ քննարկումները պետք է շարունակվեն, որ մենք համոզվենք՝  այդտեղ ամեն ինչ ճիշտ է և արդյունավետ: Հիմա պայմանավորվում ենք, որ անապահով ընտանիքների համար սակագինն իջնելու է, մնացածի մասով քննարկումները շարունակվելու են: Եզրակացությունները պետք է լինեն համոզիչ և թափանցիկ»: