Ձեր վստահելի աղբյուրը

Վարչապետ Նիկոլ Փաշինյանը ոստիկանությանը հանձնարարեց բացառել սահմանված ժամից հետո հրավառության կազմակերպման դեպքերը:

Գործադիրի այսօրվա նիստում  ՀՀ  առողջապահության նախարար  Արսեն Թորոսյանը հայտնեց, որ  գիշեր՝ 00:30-ին, Նորք-Մարաշում հրավառություն է տեղի ունեցել, կա նաև ձայնագրություն:
«Գիտեմ, որ օրենսդրական բացեր ունենք, բայց  խնդրում եմ բոլոր շահագրգիռ կազմակերպություններին այս հարցով զբաղվել, քանի որ գեթ մեկ երեխայի հանգիստ քունն ավելի կարևոր է, քան 500 հոգու քեֆ-ուրախությունը», - նշեց Արսեն Թորոսյանը:

ՀՀ վարչապետ Նիկոլ Փաշինյանը նկատեց, որ օրենքը կարգավորված է և ուժի մեջ է մտած և ոստիկանակն բաժանմունքները պետք է այդ հարցով զբաղվեն:

Ոստիկանապետ Վալերի Օսիպյանն էլ ասաց, որ օրեր առաջ էլ այս թեմայով  հայտարարությամբ են հանդես եկել,  բայց կան նաև դժվար հայտնաբերվող  դեպքեր:

Վարչապետն արձագանքեց. «Օրենքով սահմանված ժամից ուշ չպետք է լինի հրավառություն և վերջ, եթե չի կարողանում համապատասխան ծառայությունն ապահովվել, որ օրենքը կատարվի, ուրեմն վատ է աշխատում»:

Նա նաև ասաց, որ ռեստորաններում շարունակաբար հրավառություն է արվում, իսկ դրանից հետո ռեստորանը չի փակվում և, եթե այդ տարածքի ոստիկանը, թաղայինը չի տիրապետում, թե ով է արել հրավառությունը, ուրեմն լավ չի աշխատում:  «Տենց էլ ընտրակաշառքները, բնակարանային գողությունները չենք կարողանում բացահայտել: Այդ ո՞վ է մի բան անելուց հետո սպասում, որ գնան, հայտանաբերեն: Դուք լուծեք այդ հարցերը, թե չէ՝ ես կլուծեմ»: