Ձեր վստահելի աղբյուրը

«Եթե վերջնական որոշում կայացվի, անապահով ընտանիքների համար էլէկտրաէներգիայի սակագինը 10 դրամով կնվազեցվի հենց հուլիսի 1-ից»,- այս մասին այսօր կառավարության նիստից հետո լրագրողների հետ զրույցում ասաց ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը:

Նա հիշեցրեց, որ կառավարության այսօրվա նիստում վարչապետին զեկուցել է էլեկտրաէներգիայի սակագնի նվազեցման հնարավորությունները:

«Զեկուցեցի, որ   այսօրվա իրավիճակում ՀՀ-ում էլեկտրաէներգիայի սակագինը վերանայելու համար կան մի շարք ռիսկեր, որոնք պետք է հաշվի առնել, գնահատել մեր հնարավորությունները, որից հետո քննարկենք սակագնի փոփոխությունը»,-ասաց  նախարարը՝ հավելելով, որ քննարկումների ընթացքում պարզվել է՝ այսօր անապահով ընտանիքների համար, որոնց թիվը 110-120 հազար է, 10 դրամով կարող են նվազեցնել սակագինը:

Ըստ նախարարի՝ այսօրվա սակագնով անապահով ընտանիքները ցերեկային ժամերին մեկ կվտ-ի համար վճարում են 40 դրամ, գիշերային ժամերի համար՝ 30 դրամ: Նվազեցնելու դեպքում ցերեկային սակագինը կդառնա 30 դրամ, գիշերայինը՝ 20 դրամ:

Հարցին, թե ի՞նչ մեխանիզմով են նվազեցնելու սակագինը,  նախարարն ասաց, որ ունեն երկու տարբերակ. «Առաջին տարբերակով, բանակցությունների արդյունքում ՀԷՑ-ը պարտավորվել է իր շահույթի հաշվին, առանց Հանրային ծառայությունները կարգավորող հանձնաժողովի հետ քննարկման, նվազեցնեն այդ գումարները: Խոսքը շուրջ 2 մլրդ դրամի մասին է մեկ տարվա ընթացքում»:

Դիտարկմանը՝ եթե ՀԷՑ-ը նման հնարավորություն ուներ, ինչո՞ւ ավելի շուտ չէր գնում այդ քայլին, նախարարը դժվարացավ պատասխանել:

Արթուր Գրիգորյանն անդրադառնալով վարչապետի հանձնարարականին՝ ուսումնասիրել ոլորտում հնարավոր կոռուպցիոն ռիսկերը,  նշեց, որ եթե էլեկտրաէներգիայի սակագնի ուսումնասիրությունների արդյունքում կոռուպցիոն երևույթներ բացահայտվեն, հնարավոր կլինի ընդհանրապես նվազեցնել սակագինը. «Չեմ բացառում, բայց պետք է հասկանանք, նոր»: