Ձեր վստահելի աղբյուրը

Մարդասիրական ոլորտի առաջատար գործիչների, նախկին պետական պաշտոնյաների, ձեռներեցների մասնակցությամբ հունիսի 9-ին իր աշխատանքը սկսեց Aurora Dialogues երևանյան երրորդ համաժողովը: «Ավրորա»-ի հյուրերը հանդիպել են՝ քննարկելու մեր օրերի առավել հրատապ հումանիտար հիմնախնդիրները:

«Ավրորա» մարդասիրական նախաձեռնության համահիմնադիր, Նյու Յորքի Կարնեգի կորպորացիայի նախագահ Վարդան Գրեգորյանը խոսեց այն մասին, թե օրըստօրե հիասթափվող աշխարհում ոգեշնչումն ու զորացումն ինչպես կարող են օգնել՝ ձևավորելու տևական և մնայուն ազդեցություն:

Նրա խոսքով՝ Եվրոպայում և Ասիայում ոմանք պարծենում են բարձր շենքերով, մի շարք այլ արժեքներով ու ձեռքբերումներով, ապա Հայաստանն իր ճակատագիրը կապել է գրքի հետ: Գրեգորյանը նշեց՝ Հայաստանն իսկապես գրքի մարդկանց տեղն է, ոչ թե այն պատճառով, որ հայերը քրիստոնյաներ են, այլ՝ քանի որ մարդկության սիրահար են. գիրքը մարդկության հիշողությունն է: Բանախոսն ընդգծեց, որ հենց գրքի նկատմամբ սիրո մասին է վկայում այն, որ հայերը խնամքով պահպանել են ոչ ոչ միայն հայկական ձեռագրերը:

Ըստ Գրեգորյանի՝ Հայաստանի ուժեղ կողմերից են սեփական այբուբենի մշակումը, քրիստոնեությունը որպես կրոն առաջինն ընդունելը է: Նրա խոսքով՝ հայերը պահպանել են իրենց ազգային ինքնությունը, բայց նաև համընդհանուր նորմերի մշակմանն են մասնակցում: Խոսքն ամփոփելով ՝բանախոսը նշեց՝ Ավրորան գալիս է ոչ թե դատապարտելու, այլ ուսումնասիրելու: