Ձեր վստահելի աղբյուրը

Հայաստան-ԵՄ համաձայնագիրն այնքան խելացի է մշակվել, որ մինչ ամբողջ ծավալով կմտնի ուժի մեջ, այս ժամանակահատվածը կարելի է անվանել գործողությունների պլանավորման փուլ։ Լրագրողների հետ այսօր կայացած հանդիպման ժամանակ նման տեսակետ հայտնեց վերլուծաբան Ստյոպա Սաֆարյանը։

«Համաձայնագրի անվանումն արդեն բան է ասում. սա շրջանակային համաձայանգիր է։ Հայ ժողովուրդը թավշյա հեղափոխության ընթացքում ապացուցեց, որ ինքը ճիշտ և ճիշտ դնում է լավ կառավարում, օրենքի երկիր ունենալու, մոնոպոլիաներ չունենալու, ստվերային տնտեսությունը կրճատելու արժեքներ ու նպատակները։ Սա լավագույն պատասխանն էր այն մեղադրանքներին, թե դրսի ինչ-որ կազմակերպություններ, մութ ուժեր փորձում են մեզ ոչ հարիր սերմեր ցանել։ Սակայն  հայ ժողովուրդն ասաց, որ սրանք իր արժեքներն են»,- ասաց բանախոսը։

Ստյոպա Սաֆարյանի խոսքով,  եթե Հայաստանում օրինակելի բիզնեսներ ստեղծվեն, էներգետիկայի ոլորտը դիվերսիֆիկացվի, արտաքին կախվածությունն էականորեն կթուլանա։

«Համաձայանգիրը մեկ-երկու տարվա ընթացքում գուցե շատ բան չփոխի, սակայն  երկրում ստեղծելու է մեծագույն լծակներ քաղաքացու ձեռքին՝ իր կյանքի ու իրավունքների համար օգտագործելու նպատակով»,- ամփոփեց նա։