Ձեր վստահելի աղբյուրը

Բալթյան երեք երկրներում հունիսի 4-8-ը տեղի է ունեցել  Նիդերլանդների արտաքին գործերի նախարարության զարգացող երկրներից արտահանման-խթանման կենտրոնի (CBI) կազմակերպած «Baltic Wine Trip & CBI See Wine Conference» խորագրով միջոցառումը, որին որպես  շահառու երկրներ ներկայացված էին Հայաստանը, Վրաստանը, Մոլդովան  և Նախկին Հարավսլավիայի Մակեդոնիա հանրապետությունը:

Լիտվայում ՀՀ դեսպանությանը հղում անելով՝  ՀՀ ԱԳՆ հայտնում է, որ Հայաստանի խաղողագործության և գինեգործության հիմնադրամի (Vine & Wine Foundation of Armenia) աջակցությամբ միջոցառմանը մասնակցել են հայկական 10 գինեգործական ընկերություններ, որի շրջանակներում Տալլինում, Ռիգայում և Վիլնյուսում կազմակերպվել են գինիների շնորհանդես-համտեսներ և վարպետութան դասեր՝ բարձրաստիճան հյուրերի, գինու փորձագետների, գնորդների ու մատակարարների համար ինչպես նաև Վիլնյուսում մասնակիցներին ներկայացվել են հայկական խոհանոցի ավանդութները:

Միջոցառման աջակիցներից է եղել նաև Լիտվայում, Լատվիայում և Էստոնիայում Հայաստանի Հանրապետության դեսպանությունը։

Վիլնյուսի հայկական «Պլենտո Գրիլ» ռեստորանում կազմակերպված գինու համտեսման երեկույթի ընթացքում դեսպանության ներկայացուցիչ Վահե Առաքելյանն իր խոսքում շնորհակալություն է հայտնել Հայաստանի խաղողագործության և գինեգործության հիմնադրամին, գինու արտադրության ներկայացուցիչներին, կազմակերպիչներին, ինչպես նաև՝ հայկական գինիներ Լիտվա ներկրող «Գադարա» ընկերությանը՝ ի դեմս ընկերության նախագահ՝ Լիտվայի հայ համայնքի ներկայացուցիչ Գառնիկ Կազարյանի՝ միջոցառման կայացման աշխատանքներում նշանակալի ներդրում ունենալու համար և համառոտ անդրադարձ է կատարել հայկական գինեգործության ավանդույթներին ու նրա զարգացման ներկա փուլին։