Ձեր վստահելի աղբյուրը

ՀՀ ԱԺ նախագահ Արա Բաբլոյանը այսօր  Լեհաստանի Հանրապետության Սեյմի լեհ-հայկական պատգամավորական խմբի ղեկավար Թադեուժ Վոժնիակի գլխավորած պատվիրակության հետ հանդիպմանը կարևորել է Լեհաստանի Սեյմի կողմից Հայաստանի և Եվրոպական միության միջև ստորագրված Համապարփակ և ընդլայնված գործընկերության համաձայնագրի վավերացումը, հույս է հայտնել, որ Լեհաստանի Սենատը ևս չի ուշացնի փաստաթղթի վավերացումը:

ԱԺ հանրային կապերի վարչության հաղորդմամբ՝ Արա Բաբլոյանը նշել է, որ հայերն իրենց նվիրվածության ու աշխատասիրության շնորհիվ արժանացել են Լեհաստանի իշխանությունների առանձնահատուկ վերաբերմունքին և ուրույն ներդրում ունեն հայ-լեհական կապերում:

Լեհ-հայկական պատգամավորական խմբի ղեկավարը, պատվիրակության անունից շնորհակալություն հայտնելով ջերմ ընդունելության համար, կարևորել է երկու երկրների միջև տարբեր բնագավառներում համագործակցության առավել խորացումն ու ընդլայնումը: Ըստ նրա՝ դեռևս առկա է չօգտագործված զգալի ներուժ, հատկապես տնտեսական բնագավառում: Թադեուժ Վոժնիակն ընդգծել է լեհերի համակրանքն ու ջերմ վերաբերմունքը Հայաստանի և հայ ժողովրդի նկատմամբ:

Պատգամավորական խմբի ղեկավարը նշել է, որ տպավորված են Հայոց ցեղասպանության հուշահամալիր այցով. «Կատարվածը ցավալի է և ողբերգական: Հուսով եմ, որ պետությունների ղեկավարներն ամեն ինչ կանեն հետագայում նման ոճրագործությունները կանխարգելելու համար»,- ասել է լեհ խորհրդարանականը:

Թադեուժ Վոժնիակը, անդրադառնալով Հայաստան-ԵՄ Համապարփակ և ընդլայնված գործընկերության համաձայնագրի շրջանակներում ինչպես երկկողմ, այնպես էլ բազմակողմ ձևաչափերում համագործակցության խորացման հեռանկարներին և հնարավորություններին, Հայաստանին աջակցելու և իր երկրի փորձով կիսվելու պատրաստակամություն է հայտնել: