Ձեր վստահելի աղբյուրը

Երևանի Հաղթանակ ու Սիլիկյան թաղամասերն իրար կապող մոտ 10 հա մակերեսով աղբավայրն անընդհատ ծխում է, կուտակված գազերից հաճախ կրակ է առաջանում, օջախներն օրեր շարունակ չեն մարում: Այս տարվա ընթացքում ԱԻՆ-ը քաղաքացիներից հրդեհի վերաբերյալ 6 ահազանգ է ստացել:

Աղբավայրի ու ծխի հոտը տարածվում է հարակից թաղամասեր, հասնում մինչև օդանավակայան, Հաղթանակ, Սիլիկյան թաղամասեր, Փարաքար, Մերձավան, Այգեկ գյուղեր: Մոտ երկու  հարյուր մետր այն կողմ արդեն ապրողներ կան: Նրանցից շատերը, հատկապես երեխաները,  ունեն շնչառական, ալերգիկ ու այլ խնդիրներ:



Բնակիչներն ահազանգում են խնդրի մասին՝ հրավիրում կառավարության, առողջապահության, բնապահպանության նախարարությունների, քաղաքապետարանի, թաղապետարանի, բժիշկների,  սանիպէդկայանի ու այլ մարմինների  ուշադրությունը:

«Առավոտյան 5-ից 6-ից հետո երբ մի թեթև հարավային քամի է լինում, անհնար է դառնում դուրս գալը: Գարշահոտ է, անտանելի ծուխ: Արդեն երկու տարի է՝ ամառ-ձմեռ  մեռանք թոռնիկներիս դեղեր խմցնելով: Մեր մեջ ալերգիա ունեցող չի եղել, ծնողներն առողջ են, երեխաներն ամբողջ օրը հազում են, կոկորդն է ցավում, բրոնխիալ խնդիրներ ունեն, հոտից թուլանում են, թունավոր գազեր են օդում: Հենց հիմա թոռնիկս թուլացած նստած է: Մենակ մեր երեխեքը չեն, հարևանների երեխաներն էլ նույն վիճակում են»,-Panorama.am-ի հետ զրույցում պատմեց բնակիչներից Սերժիկ Հարությունյանը:

Այն շենքը, որտեղ ապրում են Ս. Հարությունյանի ու նրա հարևան 24 ընտանիքները՝ մոտ 160-170 մարդ, աղբավայրից առավելագույնը 200 մետր հեռավորության վրա է: Շոգին պատուհանները փակ են պահում: Աղբավայր հիմա քիչ են աղբ տեղափոխում, հիմնականում գիշերվա ժամերին, չնայած մինչ այդ մեծ հրդեհից հետո բնապահպանության նախարարությունը հայտարարել էր աղբավայրի փակման մասին:

«Հողածածկման աշխատանքներ չեն ցանկանում անել: Աղբավայրից մի քիչ այն կողմ էլ մեծ խոզանոց կա: Կանալիզիացիայի ջրերը լցվում են այնտեղ, մեծ լճի նման տեղ է դարձել, լիքը առնետներ, վայրի շներ: Մի սարսափելի էկոլոգիական վիճակ է»,-ներկայացնում է քաղաքացին:
Ս. Հարությունյանը նշում է, որ ամեն ընտրությունից առաջ խնդիրը բարձրացնում են, խոզանոցն էլ հայտնի գործարարներից մեկին է պատկանում: Դիմել են քաղաքապետարան, այնտեղից ուղղորդել են թաղապետարան, թաղապետարանից հայտնել են՝ իրենք այդ առումով իրավասություն չունեն:

«Մենք միշտ ուզել ենք, որ մարդկային փոխհարաբերությունները պահպանենք: Ասել են՝ հեսա փակվելու է, մենք էլ հավատացել ենք: Ասել էին՝ ապրիլին փակվելու է: Պաժառ ընկավ էլի չփակվեց: Մենք նորից դիմելու ենք կառավարություն, քաղաքապետարան»,-ասում է բնակիչը:
Եթե այս անգամ էլ խնդիրն արձագանք չստանա, ապա բնակիչները որոշել են մի քանի հարյուր հոգով դուրս են գալու փողոց:



«Հիմա բոլոր տեղերում ճամփա են փակում, բայց մեզ դա դուր չի գալիս: Առանց այդ էլ խնդիրները շատ են: Բայց եթե լուծում չեղավ, մենք էլ պետք է այդ քայլին դիմենք»,-ասում է նա:
Սերժ Հարությունյանն աշխատում է  Հարավկովկասյան երկաթուղու Սպանդարյան կայարանում, որը շատ հեռու չէ աղբավայրից: Կայարանապետի խոսքով, հրդեհի հետևանքով առաջացող ծուխն ու հոտը նույնիսկ անվտանգ երթևեկության համար են սպառնալիք ու վտանգ ներկայացնում:

«Պատկերացրեք, աշխատակիցը  դուրս է գալիս գնացք դիմավորի, բերանը փակում է,  հետ գնում, ծուխը մրմռացնում է աչքերը: Եթե քամին Չորրորդ գյուղի կողմից փչում է, խելռում ենք: Հասնում է մինչև Նուշի Սովխոզ, մինչև օդանավակայան: Մի քանի տարի առաջ էդ ծխի հետևանքով նույնիսկ օդանավը չէր կարողացել վայրէջք կատարել»,-նշում է բնակիչը:

Հաղթանակ թաղամասի բնակիչ Արմեն Եփրեմյանն էլ պնդում է, որ 1994-ից գործող այս աղբավայրն անօրինական է: Բնակիչների բազմաթիվ ահազանգերը, դժգոհությունները ու դրանց հիման վրա արված մամուլի հրապարակումները մնացել են անպատասխան:  Բնապահպանության նախարարությունից եկել էին փորձանմուշներ  են տարել, պատասխանների մասին մինչ այս պահը  գոնե բնակիչներին ոչինչ հայտնի չէ:  Առողջապահության նախարարությունից էլ արձագանք չեն ստացել:
«Ո՞ւր փախնեն մարդիկ իրենց տներից: Աղբավայրը հանրային առողջությանը խիստ վնաս է հասցնում»,-ասում է Եփերմյանը:

Նշենք, որ վերջին խոշոր հրդեհն աղբավայրում բռնկվել է ապրիլի 19-ին, երբ այրվել է մոտ 2000 խմ աղբ: Հրդեհաշիջման աշխատանքներին մասնակցել է 1 թրթուռավոր տրակտոր և քաղաքապետարանի 2 ջրատար:

Լուսանկարները տրամադրել է քաղաքացի Արմեն Եփրեմյանը: