Ձեր վստահելի աղբյուրը

«Ի՞նչ նկատի ունենք, երբ ասացիք՝ կրքերը հանդարտվել են, և մարդկանց արդեն կալանքից ազատում են, խափանման միջոցը փոխվում է»,- ԱԺ-ում ՍԴ անդամի թեկնածու Ելիզավետա Դանիելյանից հետաքրքրվեց «Ելք» խմբակցության պատգամավոր Էդմոն Մարուքյանը:

«Կրքերի հանդարտման առումով ես երևի խոսքը հստակ չէի ձևակերպել: Նկատի ունեի, որ ստեղծվել է մի իրավիճակ, երբ դատարանները հնարավորություն ստացան հնչեղ գործերով դատական նիստերն իրականացնել: Ստեղծվել էր մի իրավիճակ, երբ դժգոհություններ հայտնելով՝ փաստաբանական համայնքի որոշ ներկայացուցիչներ բոյկոտում էին դատական որոշ նիստերը, չէին ներկայանում, դատարանների նկատմամբ անհարգալից վերաբերմունք էին արտահայտում և գործերի սկսման հնարավորություն չէր լինում: Այս առումով եմ ասում, որ կրքերը հանդարտվեցին, և նիստերը մտան բնականոն փուլ, և հնարավորություն ստեղծվեց խափանման միջոցները փոխել, ինչը ուրախալի է բոլորիս համար»,-պատասխանեց նա:

«Ելք»-ի պատգամավորը հարց ուղղեց Դանիելյանին, թե նա ինչո՞վ է աչքի ընկել, որ հենց նրան են որպես ՍԴ անդամի թեկնածու ընտրել:

«Չեմ կարող որոշակի առանձնահատկության մասին խոսք ասել: Թեկնածությունը ներկայացվել է Դատավորների ընդհանուր ժողովի արդյունքում, դատավորական համայնքն իր վստահության քվեն փոխանցել է ինձ»,-ասաց նա:

Մարուքյանն արձագանքեց. «Մենք այսպես ենք հասկացել Ձեր ասածը, որ հետհեղափոխական վիճակից ելնելով է, որ կրքերը հանդարտվել են, և դատարանները սկսել են լավ աշխատել: Բայց մյուս կողմից Ձեր պատասխանը հետևյալն է, որ դատավորները չէին կարող աշխատել: Պետք է նկատի ունենալ, որ դատավորներն էլ անտեղի նկատողություն են արել, դահլիճից հեռացրել, հազար ու մի խնդիրներ առաջացրել: Ես ուղղակի ուզում եմ հասկանալ՝ մենք որ ասում ենք՝ բան է փոխվել, այդ բան փոխվելը դատարանների վրա ո՞նց է ազդում»:

ՍԴ դատարանի թեկնածուն խոսքը հստակեցրեց, որ բոլոր միջնորդությունները, որոնք արվում են դատավարության մասնակիցների կողմից, պետք է հնարավորություն ունենան քննության առարկա դառնալ:

«Թե ինչպիսին կլինեն լուծումները, ցույց է տալիս կոնկրետ գործերով դատարանի իրականացնող քննությունը: Ես չեմ կարող կանխատեսել՝ ինչ լուծումներ կլինեն, այսօր իրականացվող դատավարությունները ցույց են տալիս, որ դատարանները բավական համարձակ, ինչը շատ ողջունելի է, փոխում են խափանման միջոցները գործերով»,- հավելեց նա։