Ձեր վստահելի աղբյուրը

«Ծառուկյան» խմբակցության անդամ Նաիրա Զոհրաբյանը «Բարեգործության մասին» ՀՀ օրենքի նախագծի թիրախ է համարում խմբակցության ղեկավար Գագիկ Ծառուկյանին:

«Նախորդ իշխանության վերջին Հանրապետական վարչապետ Կարեն Կարապետյանը, իհարկե, երկնելով բարեգործության մասին այս օրենքը, ուներ միայն մեկ թիրախ Գագիկ Ծառուկյանին:  Սա հասկանալի է: Հասկանալին այն չէ, թե ինչու է այս կառավարությունը որպես իր օրենսդրական առաջին նախաձեռնություններից մեկը բերում մի երկրում մի օրենք, որտեղ 30 տոկոս պաշտոնական աղքատությանը գումարվում է 30-40 տոկոս աշխատող աղքատների թիվը և փորձում դրանով կրկին թիրախ դարձնել Գագիկ Ծառուկյանին»,-ԱԺ-ում հայտարարությունների ժամին ասաց Զոհրաբյանը:

Նա հարցրեց՝ ով է լինելու այն մեկը, ով որոշումներ կայացնելու մոնոպոլիա է ունենալու՝ ո՞րն է բարեգործություն, որը՝ ոչ:

«Էդ ո՞նց եք որոշելու, գիր ղուշով եք որոշելո՞ւ, թե՞ ըստ ձեր քաղաքական նպատակահարմարության ու քաղաքական ճաշակի: Ի տարբերություն ձեզ, այս տարիների ընթացքում ինչ-որ արել է Գագիկ Ծառուկյանը որպես բարեգործ որևէ քաղաքակն կոնտեքստ չի եղել»,-նշեց նա՝ հորդորելով այդ մասին հարցնել ուսանողներին, խաղողագործներին, անօթևաններին, հաշմանդամություն ունեցող աձանց:

Նա կոչ արեց պետությանը լուծել  անօթևանների խնդիրը, իսկ եթե չի կարող՝ ուրեմն պետք է չխանգարել օգնել ցանկացողներին:

«Այն մարդիկ, ովքեր մտածում են, որ այս օրենքով վատություն են անում Գագիկ Ծառուկյանին, ապա պիտի ասեմ, որ խորապես սխալվում են: Դուք վատություն անելու եք այն սոցիալական խավերին, ովքեր օգտվում են այդ բարեգործությունից: Եթե այս օրենքը ընդունվի, ապա ես լինելու եմ այն մարդկանցից մեկը, որ հորդորելու եմ Գագիկ Ծառուկայնին՝ հուլիսի 1-ից դադարեցնելու բոլոր բարեգործական ծրագրերը և բոլոր շահառուներին, ովքեր կդիմեն Գագիկ Ծառուկյանին,  մենք ուղղորդելու ենք դեպի կառավարություն»,-ասաց Ն. Զոհրաբյանը: