Ձեր վստահելի աղբյուրը

Արցախի Տիգրանակերտի տարածքը կազմում է 70 հեկտար, պեղված է այդ տարածքից 1,8-1,9  հեկտարը: Panorama.am-ի հետ զրույցում Տիգրանակերտի արշավախմբի ղեկավար Համլետ Պետրոսյանն ասաց, որ թեև տարածքի առումով քիչ է, բայց քաղաքի կերպարի որոշակի կարևոր կետեր բացահայտված են:

Նա տեղեկացրեց, որ այս տարվա հուլիսի սկզբից կվերսկսվեն պեղումները, Արցախի իշխանությունները պեղումների համար հատկացրել են 10  միլիոն դրամ. «Այդ գումարը  հնարավորություն է տալիս հոգալու արշավախմբային ծախսերը, իրականացել  25 օր պեղումները»:

Հ. Պետրոսյանն ասաց, որ երեք մեծ  ծրագիր են ներկայացրել իրականացնելու համար:

«Այդ ծրագրերն ուղարկել ենք նաև որոշ գործարարներին՝ իրենց խնդրանքով, բայց առայժմ պատասխան չկա»,- ասաց արշավախմբի ղեկավարը:

Նա տեղեկացրեց, որ շարունակելու են  ամրացված թաղամասի հյուսիսային պարսպապատի  պեղումները, փորձելու են անտիկ դամբարանադաշտի  թաղումների տեղը պարզել հատուկ լուսանկարման միջոցով, պեղել նոր տարածքներ:

«Դամբարանադաշտի պեղումները շատ կարևոր են:  Թաղումների մեջ հաճախ ենք դրամներ գտնում: Ընդամենը երկու դամբարան ենք պեղել, հայտնաբերել ենք 6 պարթևական դրամ,  վերաբերում են մ.թ..ա 1-ի դարի կեսերին: Տիրգան Մեծի դրամների շրջանառությունը շատ փոքր է, եթե վերցնենք ժամանակի մեջ: Եթե մի 100 դրամ գտնենք, դրանց մեջ Տիգրան Մեծին վերաբերող դրամները քիչ տոկոս կկազմեն:   Առնվազն 30-40 թաղում պետք է պեղենք  այդքան դրամ գտնելու համար, ինչը մեծ ծավալի աշխատանքների հետ է կապված: Մենք չենք կարող տեխնիկա կիրառել, դամբարանների տեղը որոշելու համար ժամանակակից  մեթոդներ կան, որը բավականին թանկ է»,- նշեց  հնագետը: 

Հ. Պետրոսյանը նաև հայտնեց, որ կարևոր ծրագիր ունեն կապված Տիգրանակերտի ջրանցքի հետ, որը շատ տեղերում ժայռափոր է: Նա գնահատմամբ, այն եզակի հուշարձան է: