Ձեր վստահելի աղբյուրը

Աշխատանքի և սոցիալական հարցերի նախարարի պաշտոնից հրաժարականը եղել է Մանե Թանդիլյանի անձնական որոշումը: ԱԺ-ում այսօր կայացած մամուլի ասուլիսի ժամանակ այս մասին ասաց «Ելք» խմբակցության պատգամավոր Էդմոն Մարուքյանը:

Նա դժվարացավ պատասխանել այն հարցին, թե որքանով այս հրաժարականը կազդի «Լուսավոր Հայաստան» կուսակցության  հեղինակության վրա:

«Ես երբեք ռեյտինգի համար ինչ-որ բան չեմ արել: Ես միշտ կայացրել եմ որոշումներ, որոնք ինչ-որ պահի դարձել են պոպուլյար: Մենք, բնականաբար, չէինք ուզենա, որ տիկին Թանդիլյանը հրաժարական տար կամ դուրս գար կուսակցությունից: Բայց որևէ մեկի որոշման վրա չի կարելի բռնանալ, դրա համար եմ ասում՝ մենք մեծ հարգանքով ենք վերաբերում նրա որոշմանը:

Մանե Թանդիլյանը կմնա մեր գործընկերը, մեր ընկերը, մեր քաղաքական թիմակիցը, և եթե վարչապետն ընդունի հրաժարականի դիմումը, ստիպված կլինենք այլ թեկնածու ներկայացնել: Եթե տարբերակ լինի, որ տիկին Թանդիլյանը շարունակի աշխատել, բնականաբար ուրախ կլինենք: Մենք  կուսակցությունում մարդկային լավ ռեսուրս ունենք և ցանկացած նախարարի պաշտոնում կարող ենք մարդ առաջարկել»,- ասաց Մարուքյանը: