Ձեր վստահելի աղբյուրը

Այսօր վերաքննիչ դատարանի որոշմամբ Ժիրայր Սեֆիլյանն ազատ արձակվեց ԱԺ տասից ավելի  պատգամավորների  («Ելք» և «Ծառուկյան» դաշիքներից) անձնական երաշխավորությամբ: Դատարանից դուրս գալուց հետո ասաց. «Ողջունում եմ բոլորին: Հետո էլ ասում են հրաշքներ չի լինում»: 

Նա նշեց, որ շատ բան ունի ասելու, բայց այսօր երկար չի խոսի. «Այժմ գտնվում ենք կարևորագույն մի հանգրվանում, որտեղ մեր սիրելիները՝ այսինքն` քաղբանտարյալները, պետք է բոլորը հայտնվեն ազատության մեջ: Մենք այս օրերին պետք է գործենք, խոսենք հնարավորինս զգույշ:  Մենք մեր գործին չենք վնասելու: Ընդամենը հաշված օրերից բոլորն անխտիր կլինեն ազատության մեջ: Առիթից օգտվելով՝ կուզեի իմ, մեր ցավը, կարեկցանքը հայտնել այն զոհերին, որոնք տեղի ունեցան 2016 թվականի հուլիսյան հայտնի իրադարձություններին: Մինչ օրս մենք՝ ոչ ես, ոչ «Սասնա ծռերը» հնարավորություն չենք ունեցել անմիջական մեր խոսքն ուղղել զոհվածների հարազատներին: Բոլորը պետք է հասկանան, որ այդ ցավը բոլորիս ցավն է:  Համոզված եմ, որ ոչ ոք  չունի այն եզրակացությունը, որ տղաները գնացել էին այդ քայլին մարդասպանության նպատակով: Կարծում եմ՝ բոլորի համար այս ամենը պարզ է, հստակ է: Մենք ամենաշահագրգիռ կողմն ենք, որ օր առաջ բացահայտվի, թե այդ սպանություններն ինչպես տեղի ունեցան: Հուսով եմ, որ առաջիկայում վերջապես Հայաստանում կունենանք անկախ դատարան, այդ դատարանում մանրակրկիտ կքննվի, թե ինչ էր տեղի ունեցել 2016 թվականի հուլիսի 17-31-ը: Ամեն ինչ պետք է հստակեցվի:
Ես այս հանգրվանին կավելացնեի առաջիկա ամիսների այլ հանգրվաններ ևս, որոնք մեզ պետք է հասցնեն մինչև ազատ, արդար թափանցիկ ընտրություններ: Մինչև այդ օրը մենք բոլորս միասին մեծ անելիք ունենք: Այս վտանգավոր հանգրվանին պետք է հասնենք հնարավորինս անցնցում վիճակում և միայն այդ ընտրություններն իրականացնելուց հետո է, որ մեր երկիրը կմտնի արդեն նոր քաղաքական փուլ, հանգիստ զարգացման, ինքնիշխանության ամրապնդման, մեր պետությունը հզորացնելու փուլ: Մինչև այդ փուլը մենք՝ «Սասնա ծռերս», բոլորս պետք է աջակիցը լինենք գործող իշխանությանը բարեհաջող հասնելու այդ հանգրվանին»,- ասաց Ժ. Սեֆիլյանը:
Նա նաև կոչ արեց արտերկրում բնակվող հայությանը  օր առաջ վերադառանալ Հայաստան:
«Օր առաջ վազելով եկեք Հայաստան, միասին  շարունակելու պայքարը՝ կառուցելու մեր երազած ինքնիշխան, հզոր Հայաստանը»: