Ձեր վստահելի աղբյուրը

Կառավարությունը վարչապետի առաջարկությամբ ընտրեց մի տարբերակ, որով  այս պահին հնարավորինս մեղմացնում է քաղաքացիների եկամուտների բեռնվածությունը: ԱԺ-ում լրագրողների հետ զրույցում այսօր այս մասին ասաց Տնտեսական զարգացման և ներդումների նախարար Արծվիկ Մինասյանն՝ անդրադառնալով կառավարության նիստի ժամանակ կենսաթոշակային համակարգի պարտադիր բաղադրիչի մասին որոշմանը։

«Առհասարակ համակարգի վերանայման, չեղարկման հարցը օրակարգում է և ուսումնասիրության կարիք ունի: Սա է կայացվել այդ օրը կառավարության նիստում»,- հայտարարեց նա։

Մինասյանը հիշեցրեց, որ ՍԴ-ում գործընկերոջ հետ շահել են դատական ակտը, ինչը դեռ իրականացված չէ, բայց նրա խոսքով, այս պահին կառավարության որոշումը հետևյալն է՝ հուլիսի 1-ից կուտակայինի մեղմացում կլինի։

Հարցին՝ ավելի տրամաբանական չէ՞ հարցն ուսումանսիրել տեսնել՝ ի՞նչն է անօրինական, ինչը՝ ոչ, նոր միայն կիրակել և 80 հազարին էլ չբերել համակարգ, նախարարը պատասխանեց.
«200 հազարից ավելին արդեն համակարգում է, վարչապետը հստակ ներկայացրեց՝ եթե հետաձգում են 80 հազարի համար, ապա 200 հազարը լեգիտիմ հարց են բարձրացնում՝ եթե հետաձգում եք, մենք ինչո՞ւ պիտի պարտադրված լինենք վճարել»։

Նա նորից շեշտեց, որ սրանով մեղմում են թե 200 հազարի, թե առաջիկա 80 հազարի համար վճարման բեռը՝ օրակարգում պահելով հարցը՝ արդյոք կուտակային պարտադիր բաղադրիչը հակասահամանադրակա՞ն է, թե՞ ո՞չ։

«Այդ հարցը պետք է քննարկաման առարկա դառնա։ Վարչապետի հայտարարությունն այս մասով շատ պարզ էր՝ եթե գանք եզրակացության, որ հակասահմանադրական է և ինչ-որ պատճառով չի համապատասխանում մեր երկրի և քաղաքացիների շահերին, որևէ խնդիր չկա այն չեղարկելու»,- ասաց նա:

Նախարարն ընդգծեց՝ որպես կառավարությունում ՀՅԴ ներկայացուցիչ՝ խոսել է ՀՅԴ-ի իրենց 10 տարվա պայքարի մասին.

«Այն ձևով ինչ ունենք պարտադիր համակարգը, տնտեսական ներկա պայմաններում չի համապատասխանում մեր քաղաքացիների, երկրի շահերին։ Մեր պայքարը ՍԴ-ում և փողոցում հստակ հիմնավորումներ ուներ, և հիմա այս կառավարությունը, ի տարբերություն նախորդների, ունի շանս և չի թաքցնում ուսումնասիրության հնարավորությունները»։

Մինասյանն ասաց, որ սկզբունքայնությունը նրա մեջ է, որ հետևողականորեն պետք է գնալ այդ հարցադրումների պատասխանի ճանապարհով:

«Դուք փորձում եք ինտրինգ փնտրել, բայց չկա այդպիսի բան: Երբ զգանք անհնարին է աշխատել, կամք կա, կհեռանանք»,- ասաց նա:

Պատասխանելով հարցին՝ հրաժարական չի՞ տալու է, նա ասաց. «Դուք ուզում եք համոզել, որ հրաժարական տա՞մ։ Հստակ պատասխանվել է՝ ոչ, չեմ պատրաստվում, ես տրամադրված եմ վճռական, որովհետև տնտեսական զարգացման ոլորտում, հակամենաշնորհային զարգացման ոլորտում հսկայական անելիքներ կան»,- ընդգծեց նա։

Անդրադառալով Փաշինյանի՝ իր հետ կառավարությունոմ շփվելու ոճին՝ Արծվիկ Մինասյանն ասաց, որ այն ընթացքում կշտկվի:

«Ես չեմ համարում, որ անհաղթահարելի բան է տեղի ունեցել: Ես ավելի շատ կենտրոնացած եմ, թե ինչ պետք է անենք, քան շփման ձևերի վրա»,- ասաց նա։

Մինասյանը նաև ափսոսանք հայտնեց Մանե Թանդիլյանի հրաժարականի կապակցությամբ: