Ձեր վստահելի աղբյուրը

««Ելք» դաշինքում տարաձայնություններ չկան, կան քննարկումներ, և խմբակցության ղեկավարի պաշտոնը այնքնա պաշտոն չէ, որքան ներկա քննարկումները: Քննարկումների արդյունքում այդ խնդիրը կլուծվի» ԱԺ-ում այսօր կայացած մամուլի ասուլիսի ժամանակ ասաց «Ելք» խմբակցության պատգամավոր Էդմոն Մարուքյանը:

«Մենք ունենք քարտուղար, նա նորմալ գործում է: դուք տեսաք, որ այսօր մեր նախաձեռնած բոյկոտի արդյունքում դատավոր չընտրվեց: Ֆրակցիան նորմալ գործում է»,- ասաց նա:

Անդրադառնալով կուտակային կենսաթոշակային համակարգի ներդրման հարցին՝ Մարուքյանը հերքեց այն տեսակետը, որ հարազատ կուսակցությունն այս սկզբունքային հարցում չաջակցեց Մանե Թանդիլյանին:

«Կառավարությունը քննարկումների արդյունքում եկել է ընդհանուր դիրքորոշման, որի արդյունքում որոշվել է այն, ինչ որոշվել է կառավարության նիստում: Այս պահին քայլ առաջ համակարգ է ներդրվել: Այն, իհարկել կարող էր հետաձգվել, բայց չի հետաձգվել»,- ասաց պատգամավորը:

Հարցին՝ այս պահին «Ելքն» իշխանությա՞ն է, Էդմոն Մարուքյանը պատասխանեց՝ այս պահին իրենք ԱԺ կանոնակարգ օրենքով ընդդիմադիր խմբակցություն են:

«Այս պահին մենք ունենք յուրահատուկ իրավիճակ: Մենք վերցրել ենք պատասխանատվության  բեռը: Կառավարությունը մեկ կուսակցության կառավարություն չէ, այն հետհեղափոխական և բազմակուսակցական է: Մենք անում ենք այն, ինչ հնարավոր է տվյալ իրավիճակում: Կա կարծիք, որ համակարգի հետաձգումը կարող է այլ, ավելի լուրջ խնդիրներ առաջացնել: Սա տարբերակ է, որին կառավարությունը ստիպված է գնացել»,- նշեց խորհրդրանական գործիչը՝ միաժամանակ հայտարարելով, որ նախկինում Մանե Թանդիլյանի և Նիկոլ Փաշինյանի միջև պարտադիր կուտակայինի մասով պայմանավորվածություններ չեն եղել, Փաշինյանը նրան ոչինչ չի պարտադրել:

Անդրադառնալով «Բարեգործության մասին» օրենքին՝ Էդմոն Մարուքյանը շեշտեց՝ վատ որևէ բան այնտեղ չի տեսել:

«Եթե այդ օրնքը կարող է լուրջ խնդիրներ առաջացնել բարգործություն անողների համար, կարող ենք քննարկել: Բայց ես կարծում եմ, որ դա իրենից որևէ պրոբլեմ չի ներկայացնում: Չեմ կարծում, որ սա ինչ-որ մեկի դեմ է արվում, կարծում եմ՝ դաշտն է կանոնակարգվում: ՀՀԿ-ն նույն բարեգործության անվան տակ մարդկանց էլեկտրաէներգիայի, գազի  վարձեր է տվել»,- ասաց պատգամավորը: