Ձեր վստահելի աղբյուրը

Երևանի կենտրոնում՝  Վազգեն Սարգսյան փողոցում կառուցված բազմաֆունկցիոնալ «Կամար» բիզնես կենտրոնում այսուհետ իր գործունեությունը կծավալի Ամերիաբանկը: Շենքի առաջին երկու հարկում  է Ամերիաբանկի «Կամար» մասնաճյուղը, չորս հարկերում՝ «Ամերիաբանկ»-ի գլխամասային գրասենյակը:

«Կամար» բիզնես-կենտրոնի տնօրեն Արտաշես Կազախեցյանը լրագրողներին մանրամասն ծանոթացրեց բիզնես-կենտրոնին:

Ամերիաբանկի «Կամար» մասնաճյուղ
Այսուհետ  Ամերիաբանկի հաճախորդները  կսպասարկվեն ամենաբարձր պահանջներին համապատասխանող գերժամանակակից տեխնոլոգիաներով հագեցած «Կամար» մասնաճյուղում: Տեղակայված է նաև 4K որակի վիդեոպատ: Ինտերիերում պահպանված են պատմական շենքերի՝ «Սև» շենքի և «Գյուղատնտեսական բանկ»-ի տուֆե քարերը, որոնք համադրված են ժամանակակից դիզայներական լուծումների հետ: Ավելին՝ սրահին կից գործում է 24/7 ռեժիմով աշխատող Express Banking համակարգը:

«Փորձել ենք հին ու նորը համադրել ուլտրաժամանակակից տեխնոլոգիաների հետ»,- ասում է «Ամերիաբանկ»-ի զարգացման տնօրեն Տիգրան Ջրբաշյանը:

«Ամերիաբանկի» գլխամասային գրասենյակում հարկերի ինտերիերի դիզայնն իրականացված է «Ամերիա քաղաք» թեմայի տրամաբանության ներքո: Հարկերի միջավայրը խորհրդանշում է քաղաքի զարգացումը՝տանելով անցյալից դեպի ապագա: Ներկայացված են հին Երևանը, արդյունաբերական դարաշրջանը խորհրդանշող ամերիկյան գործարար կենտրոնը (downtown), մեր օրերի կարևոր զաղափարախոսություններից մեկը՝ էկոլոգիական քաղաքը խորհրդանշող կանաչ քաղաքը և ապագայի նորարարական ու տեխնոլոգիական աշխարհը: Հանդիպումների սրահները կրում են հայ մեծերի՝ Կոմիտասի, Սայաթ-Նովայի, Մ. Սապանի, Մ. Մաշտոցի, Հայաստանի հին տեղանունների անվանումները՝ Մուշ, Անի, Կարին, Կարս, Վան, Կիլիկիա և այլն, ինչպես նաև տվյալ տարածքի դիզայներական լուծումներին համապատասխան այլ անվանումներ՝ Մատրիցա, Ավատար, Թայմս Սքուեր, Ալֆա, Հորիզոն, Space X, Ուոլ Սթրիթ:

Ի դեպ բոլոր հարկերում աշխատակիցների համար կան հատուկ հանգստյան գոտիներ:

BREEAM հավաստագիր
Արտաշես Կազախեցյանը  հայտնեց, որ «Կամար» բիզնես-կենտրոնն Ա դասի առաջին «կանաչ» բիզնես-կենտրոնն է Հայաստանում և արժանացել է BREEAM հավաստագրի: Կենտրոնը Հայաստանում առաջին կառույցն է, որն արժանացել է աշխարհում «կանաչ» շինությունների էկոլոգիական գնահատման և դասակարգման բրիտանական առաջատար BREEAM (BRE Environmental Assessment Method) համակարգի հավաստագրին: «Կանաչ» շենքերի կառուցման ընթացքում օգտագործվում են շրջակա միջավայրի համար բացառապես անվտանգ նյութեր: Օգտագործվող շինանյութի որակն ու դիմացկունությունը ապահովում են կառույցի երկարակեցությունը, իսկ էներգախնայող համակարգերը թույլ են տալիս նվազեցնել կոմունալ ծախսերը մինչև 35%:

Կամարի կանաչ պատը
«Կամարի» ամենաինքնատիպ նորարարական լուծումներից մեկը Green Lad ընկերության նախագծած «կանաչ» պատն է, որն աշխարհում ամենամեծերից է և ունի 20 մետր բարձրություն, ընդհանուր մակերեսը 160 քմ է: Ուղղահայաց կանաչապատման ամենակարևոր առավելությունը յուրահատուկ թարմությունն ու բնական տեսքն է, որն ունի շինությունը: Բացի այդ, կանաչ պատը կատարում է օդի զտում, ջերմամեկուսացում և նվազեցնում է աղմուկը: Այն ծառայում է նաև որպես արևի ճառագայթներից պաշտպանող ծածկ՝ մեղմացնելով շոգը 8-10 աստիճանով: 1 քմ-ի վրա տեղադրվում է 32 բույս: Կարևոր է, որ բույսերի տարբեր տեսակները միմյանց համապատասխանեն ջրի նկատմամբ ունեցած պահանջով: 20 մետր բարձրության վրա առանց ուղղակիորեն մուտքի և ելքի հնարավորության բույսերի խնամքը կազմակերպելու նպատակով ձեռք է բերվել հատուկ սարք Իտալիայից: Բացի այդ՝ կիրառվել են լրացուցիչ բաղադրիչները բույսերի համար՝ համապատասխան միջավայր ապահովելու նպատակով: Անհրաժեշտ խոնավությունն ապահովելու համար յուրաքանչյուր պատի տակ կառուցվել են փոքրիկ ջրվեժներ, որտեղից ջուրը գոլորշիանում է՝ ստեղծելով լրացուցիչ խոնավություն: Կանաչ պատի տեղակայման դիրքը թույլ չի տալիս, որ արևի ճառագայթներն ուղղակիորեն հասնեն բույսերին: Լրացուցիչ լուսավորություն ստեղծելու համար օգտագործվում են ֆիտոլամպեր, որոնք ապահովում են բույսերի աճն ու առողջ միջավայր:

Թանգարան, որը ներկայացնում է Երևանի ֆինանսական պատմությունը
Կարևորելով մեզ հասած պատմական ժառանգությունը և սերունդներին փոխացնելու առաքելությունը,  «Կամար»-ի ներսում ստեղծվել է թանգարան, որտեղ կան տարբեր բացառիկ լուսանկարներ Երևանի և Թբիլիսիի արխիվներից: Հավաքագրված է հսկայական ինֆորմացիա «Սև շենքի», Գյուղատնտեսական բանկի, դրանց միջև տարբեր ժամանակներում տեղակայված տարատեսակ կառույցների և հարակից կառույցների ու նախկինում ֆինանսական կենտրոն հանդիսացած հրապարակի վերաբերյալ: Թանգարանը բաղկացած է երեք մասից՝ առաջին հատվածում Հին Երևանն է, երկրորդում՝ Թիֆլիսի առևտրային բանկի ստեղծման վերաբերյալ փաստաթղթերն ու լուսանկարներ են, Գյուղատնտեսական բանկի ստեղծման պատմությունը ցույց տվող լուսանկարներ: Երրորդ բաժնում ներկայացված է նոր ժամանակաշրջանը:  Թանգարանի նմուշներում են բացառիկ փաստաթղթեր և անգամ Թիֆլիսի առևտրային բանկի Էրիվանյան մասնաճյուղի կնիքի նմուշը: Ի դեպ Արխիվային նյութերի ուսումնասիրությունների ընթացքում բացահայտվել է, որ «Սև շենքի» իրական ճարտարապետը թիֆլիսահայ Միքայել Օհանջանյանն է, սակայն մինչև վերջերս շենքի ճարտարապետն է համարվել Բորիս Մեհրաբյանը:

Ճարտարապետական ակնարկ
Շենքը բաղկացած է 9 հարկից, որի մեծ մասն արդեն վարձակալված է: Այստեղ է գտնվում «Ամերիաբանկի» գլխամասային գրասենյակը, «Կամար» բանկի մասնաճյուղը,  Ասիական զարգացման բանկի գրասենյակը, շուտով այստեղ կտեղափոխվի նաև Մեծ Բրիտանիայի դեսպանատունը: «Կամար» բիզնես-կենտրոնի ճարտարապետները են Ռուբեն և Միքայել Հասրաթյանները: Շենքը նախագծվել է 2014 թվականին: Համալիրը միավորում է տարբեր պատմական ժամանակաշրջանների 3 շենքեր՝ ցարական, խորհրդային, ժամանակակից:

«Սև շենքը», որը կառուցվել է Ամասիայի սև տուֆից, ինչով էլ պայմանավորված է շենքի անունը, կառուցվել է թիֆլիսահայ ճարտարապետ Միքայել Օհանջանյանի նախագծով՝ 1910 թվականին: Այն տարածաշրջանում մեծ դերակատարում ունեցող Թիֆլիսի առևտրային բանկի Էրիվանյան մասնաճյուղի շենքն է եղել, ուր մինչ այսօր էլ իրականացվում է բանկային գործունեություն: Այնտեղ 1926 թվականին կառուցվել է նաև Գյուղատնտեսական բանկի շենքը՝ ճարտարապետը  Նիկոլայ Բունիաթյանի նախագծով, իսկ կառուցման գաղափարը պատկանում է Ալեքսանդր Թամանյանին:

Այս շենքերի ճակատամասերը վերականգնվել են և օգտագործվել «Կամար» բիզնես կենտրոնի  կառույցի կառուցվածքում: Կառույցի մուտքը զարդարում է մետաղյա ծառի քանդակը, որը  հեղինակել են ճարտարապետ Ռուբեն Հասրաթյանն ու քանդակագործ Դավիթ Երևանցին:

«Կամար» բիզնես-կենտրոնի տնօրեն Արտաշես Կազախեցյանը լրագրողների համար կազմակերպված շրջայցի ընթացքում ներկայացնելով շենքի պատմությունը՝ նշեց, որ շենքի սեփականատեր՝ «Ամերիա» ընկերությունների խմբի մեջ մտնող «Փրոփերթի Դիվելոփմենթ Քամփնի» (Property Development Company CJSC) ընկերությունը,  կարևորելով տարածքի հին կառույցների ճարտարապետական նշանակությունը, դրանք պահպանելու ու գալիք սերունդներին փոխանցելու  առաքելությունը, մեծ պատասխանատվությամբ է նախաձեռնել դրանց վերակառուցման աշխատանքները: