Ձեր վստահելի աղբյուրը

Մշակույթի նախարարության ֆեյսբուքյան պաշտոնական էջը զգուշացնում է, …  եթե թարգմանենք զգուշացումը, կստացվի, որ մշակույթի նախարարությունը պատրաստվում է ի կատար ածել իր նվազագույն պարտավորություններից մեկը՝ պահպանել մշակույթի հուշարձանները ձևափոխումից:  Ճիշտ է, իրենց մոտ դա ասելը բավական երկար է ստացվել...  Բայց դե՝ մենք էլ գրել գիտենք՝ այսքան տարի գրեցինք հա գրեցինք մշակույթի նախարարության դեմ, մասին ու  –ին:

Քանի մշակույթի նախարարը սոցապ նախարարի պես չի հանդիպել ինչ-ինչ խութերի ու հրաժարական չի գրել, հուշենք, թե  էլ ինչ հրատապ գործեր ունի, բացի սեփական նախարարության կանոնադրությունը ու օրենքները կարդալը:

Նախարարության՝  հուշարձանների պահպանման մասին գրավոր ՀՈՒՀ անելուն զուգընթաց ասենք, որ այդ հուշարձանները վաղուց պիտի հատուկ գրանցամատյանում (հուշարձանների գրանցամատյանում) գրանցված լինեին, ունենային անձնագրեր, նկարագրություն:

Այնինչ՝ 05/11/2016  Հուշարձանների պետական կադաստրի վարման համակարգը չկա ու... չկա:

Ի դեպ՝ պակաս կարևոր չեն այդ հրապարակման նաև հարակից հրապարակումները: Միայն վերնագրերը ինչ ասես արժեն.
• Ճարտարապետ. Շատ քաղաքապետեր չգիտեն, թե որտեղ են իրենց ղեկավարած համայնքի գլխավոր հատակագծերը
• Մշակութային հուշարձանի շրջակայքում գտնվողի հողի վրա օբյեկտ դնելն ո՞ւմ իրավասության հարցն է
• Կարո Այվազյան. «Ախր էդ հուշարձանն ունի պատմական միջավայր, որը պետք է պահպանել»
• Մարկ Գրիգորյան. Ժամանակն է խոսել, թե ինչպես է հայկական կոռուպցիան խժռում Երևանը
• Հայաստանում մշակութային ժառանգությունը պետք է դառնա հասարակության ունեցվածքը. Հ.Պետրոսյան
• Մրցանակ հայկական հուշարձաններին՝ անտեսված ու վտանգված լինելու համար
• Հայաստանի տարածքում առավել վտանգված է 245 հուշարձան
• Մշակույթի նախարարությունը` Թումանյանի կկվի դերում
• Մշակույթի նախարարն այցելել է «Փակ շուկա» ու տեսել…
• «Փակ» շուկա. Մերկ օրենք ու օրինաչափ անօրինականություն
• Փակ շուկա. ՀՀ օրենքով մշակույթի նախարարությունը պարտավոր է դիմել ոստիկանություն
• Ի՞նչ արժեք է «Մոսկվա» կինոթատրոնի ամառային դահլիճի շենքը
«Մեր գոյությունը կարող ենք մեր տեսակով միայն պահպանել»

Տիկին նախարար, իսկ Դուք գիտեի՞ք, կամ գիտե՞ք, թե  Ովքեր չէին ասում ու ովքեր էին ասում ամբողջ ճշմարտությունը Փակ շուկայի մասին:

Ու սա դեռ Երևանի մի փոքր մասի մասին է միայն: Այնինչ նախարարության գործառույթների մեջ է մտնում ամբողջ ՀՀ տարածքում ու դրանից դուրս հայկական մշակութային արժեքների պահպանման գործը ևս:

Տիկին նախարար

Դուք չեք կարող պահանջել քաղաքացիներից հուշարձանների պահպանում, եթե ինքներդ օրինակ չծառայեք: Ու խոսքը ոչ միայն «այժմյանից սկսած» ժամանակի մասին է:

Մշակույթի նախարարությունը, ինչպես և ցանկացած նախարարություն, ինչպես և ամբողջ կառավարությունը,  իրավահաջորդ է նախորդներին:

Այսինքն՝ որքան էլ դուք չսիրեք, կամ չընդունեք  նախկին նախարարների  պաշտոնավարման ձևը, որակը, գործարքները, միևնույն է՝ դրանց պատասխանատվությունը կրում եք:

Այսինքն՝ եթե նախորդ նախարարը արել է իրավախախտում, կամ անգործություն է ցուցաբերել, ինչը բերել է հանցանք-զանցանքի (օրինակ՝ Փակ շուկան), դուք նաև դրանց կրողն եք:

Չեք կարող ասել՝ ինչ եղել՝ եղել է, հիմա սկսում ենք նորից:

Ուստի՝ կոչը՝ կոչ ու խոսք, բայց ահա գլխավոր հարցը՝  իսկ ինչ եք պատրաստվում անել դուք:

Բարձրացրեք բոլոր պայմանագրերը, որոնց  խնդրո առարկաները հուշարձաններ են (գրանցված, չգրանցված), ու ուսումնասիրեք՝ կա՞ն խախտումներ: Ինչպիսի՞  հետևանքներ ու քայլեր պիտի բխեն այդ խախտումներից, որ Հայաստանի Հանրապետության քաղաքացիները  տեսնեն ու սովորեն, թե ինչ է նշանակում հուշարձան, հուշարձան պահպանել, խոսքը գործ դարձնել:

Ու՞մ եք դիմելու խախտումների համար, եթե նույնիսկ Դատախազության աչքի վերևը ԲԱՆ կա:

Կարո՞ղ եք ստիպել, որ ժամանակավոր սեփականատերերը, որ աղավաղել, փչացրել են հուշարձանները, դրանք բերեն իրենց նախնական տեսքին: Պատասխանատվություն կրեն: Պատիժ ստանան:  Բարձրացրեք այդ հարցերը կառավարությունում, դիմեք դատարան՝ ընդդեմ  խախտում արածների, անողների,  քաղաքապետարանի:

Չէ՞ որ ասել եք, որ «մշակույթը ես» եք:

Սկսեք Ձեզնից:

Անահիտ Ոսկանյան