Ձեր վստահելի աղբյուրը

ՀՀ Տնտեսական մրցակցության պաշտպանության պետական Հանձնաժողովին են դիմել ձվի արտադրությամբ զբաղվող մեկ տասնյակից ավելի փոքր և միջին ընկերությունների ղեկավարներ՝ դժգոհելով ձվի իրացման շուկայում ստեղծված իրավիճակից: Մտահոգությունները ներկայացնելու և խնդիրները քննարկելու նպատակով արտադրողներն այսօր ՏՄՊՊՀ-ում են եղել։

ՏՄՊՊՀ-ից հայտնում են, որ քննարկման ժամանակ  արտադրողները տեղեկացրել են, որ  խոշոր արտադրողները շուկայում ձուն վաճառում են ինքնարժեքից ցածր գնով, ինչի պատճառով համեմատաբար փոքր ընկերությունները մեծ վնասներն են կրում ՝ կանգնելով շուկայից դուրս մնալու վտանգի առաջ:

Ըստ  Գյումրիում գործունեություն իրականացնող «Ձեզ համար» ՍՊԸ տնօրեն Համբարձում Մաթևոսյանի, իրացման շղթայում խանութները հիմնականում ուղղակիորեն չեն համագործակցում իրենց հետ: Նրանք աշխատում են միջնորդավորված՝ վերավաճառողների միջոցով, որոնք իրենցից ձուն գնում են միջինում 25-30  դրամով, վերավաճառում են խանութներին և արդյունքում այն վերջնական սպառողին է հասնում  40 - 60 դրամով; ՍՊԸ տնօրենի խոսքերով,  իրենց թռչնաֆաբիկաներում առկա է  հազարից առավելագույնը տաս հազար թռչուն, ինչը նշանակում է, որ իրենք արտադրական ծավալներով տասնյակ անգամ զիջում են խոշոր արտադրողներին: «Արամուս» ՍՊԸ տնօրեն Հրայր Ասլանյանի խոսքերով, իրենց հաշվարկներով ձվի ինքնարժեքը արտադրողների մոտ կազմում է 41-42  դրամ: Հետևապես նրանք չեն կարող վաճառք իրականացնել 25  դրամով, ինչը ըստ արտադրողի այսօր փաստացի կատարվում է: 

Երազգավորս գյուղում  գործունեություն իրականացնող անհատ ձեռնարկատեր Սուրեն Գրեյանն էլ հարց է բարձրացնում ձվի մակնշման հետ կապված, ինչը ևս կարող է  անհավասար պայմաններ ստեղծել դաշտում:  Ըստ արտադրողի, խոշոր ընկերությունների մոտ շատ հաճախ տեղի է ունենում արտադրական ծավալների ավելցուկ, պահանջարկով պայմանավորված՝ վերջիններս ստիպված  պահեստավորում են իրենց արտադրանքը, ապա այն որոշ ժամանակ անց հանում են շուկա՝ տվյալ օրվա մակնշումով: Ըստ արտադրողների տեսակետի, պետք է նաև լիմիտավորվի ձվի արտադրության կամ ներկրման ծավալները: Հանձնաժողովում տեղի ունեցած քննարկման ժամանակ, նրանք առաջարկել են, որպեսզի որոշակի ծավալներից ավելի արտադրելու կամ ներկրելու պարագայում կիրառվի ավելի բարձր հարկային շեմ, ինչն իրենց կարծիքով դաշտում որոշակի կանոնակարգում կմտցնի:

ՏՄՊՊՀ  նախագահ Արտակ Շաբոյանը նշել է, որ թեև դաշտը մրցակցային է, սակայն կան խոշոր ընկերություններ, որոնց գործունեության նկատմամբ, ինչպես նաև արտադրանքն իրացնող խոշոր առևտրային կետերի նկատմամբ իրականացվում է  որոշակի վերահսկողություն և կան օրենքով սահմանված որոշակի  սահմանափակումներ:

Աղբյուրի փոխանցմամբ՝ հանձնաժողովը լայնածավալ ուսումնասիրություն կսկսի՝ ներառելով ողջ շղթան՝ փաստաթղթաշրջանառությունից մինչև գնագոյացում և իրացման շուկա: