Ձեր վստահելի աղբյուրը

Գործադիրի այսօրվա նիստում ներկայացվեց «Ոստիկանության մասին» օրենքի նախագծում և հարակից օրենքներում փոփոխություններ և լրացումներ կատարելու մասին նախագծերի փաթեթը:

ՀՀ ոստիկանապետ Վալերիյ Օսիպյանը  նշեց, որ օրինագծով առաջարկվում է երթևեկության անվտանգությունն ապահովելիս արգելել ոստիկանության կողմից շարժական տեսաձայնագրող կամ լուսանկարահանող տեխնիկական միջոցների օգտագործումը:

Օրինագծի հեղինակներն, ըստ ոստիկանապետի, իրենց առաջարկությունը հիմնավորում են այն պատճառաբանություններով, որ ոստիկանության ծառայողի կողմից շարժական տեսաձայնագրող կամ լուսանկարահանող տեխնիկական միջոցներ չեն կարող օգտագործվել ճանապարհային երթևեկության անվտանգության բնագավառում:

Ըստ նախագծի հեղինակների՝ ճանապարհային ոստիկանության ծառայողները ճանապարհային երթևեկության անվտանգությունն ապահովելիս չեն ապահովում «Ոստիկանության մասին» օրենքի 22-րդ հոդվածի 4-րդ մասով սահմանված` շարժական տեսաձայնագրող կամ լուսանկարահանող տեխնիկական միջոցներով ոչ գաղտնի վերահսկողության մասին ոստիկանության ծառայողի կողմից բանավոր նախազգուշացնելու սահմանված պահանջը և «փաստորեն խախտման փաստի արձանագրումը տեղի է ունենում առանց սուբյեկտի համաձայնության», ինչը չի բխում «Անձնական տվյալների պաշտպանության մասին» օրենքի 16-րդ հոդվածի պահանջներից:

Վ.Օսիպյանն ասաց, որ ՀՀ կառավարությունն առաջարկում է ներկայացված նախագծով քննարկվող գործող օրենքի հոդվածը թողնել անփոփոխ:

«Նշված հիմնավորումները բավարար չեն օրինագծին հավանություն տալու համար, քանի որ շարժական տեսանկարահանող սարքերի շահագործումն ունի իրավախախտումները զսպող էֆեկտ և իրականացվում է Սահմանադրությանը համապատասխան»,- հայտնեց ոստիկանապետը:

Վարչապետ Փաշինյանը հետաքրքրվեց, թե որ շարժական տեսանկարահանող սարքերի մասին է խոսքը,  կան 3 տիպի շարժական սարքեր՝ պետավտոտեսչության ավտոմեքենաների մեջ տեղադրված, ոստիկանների համազգեստների վրա օգտագործվող տեսախցիկներ և իրավախախտումներ արձանագրող տեսանկարահանող սարքերով մեքենաները:

«Հիմա այս կարգավորումները վերաբերում են երեք դեպքերի՞ն, թե նրանց մի մասին»,- հետաքրքրվեց վարչապետը:

Վալերիյ Օսիպյանը նշեց, որ կարգավորումները վերաբերում են, այսպես կոչված, շրջիկ խախտումներ արձանագրող մեքենաներում տեղադրված տեսախցիկներին. «Այդ մեքենաները հատուկ կահավորված են լինելու տարբերանշաններով, որը վարորդներին  հնարավորություն է տալու նախապես տեսնել: Եվ դա լինելու է այն հատվածներում, որտեղ նկարահանումների վերաբերյալ ցուցանակներ են տեղադրված լինելու: Այսինքն՝ վարորդը նախապես տեղեկացված է լինելու, որ նկարահանվում է այդ տարածքում»,- նշեց Օսիպյանը:

Նիկոլ Փաշինյանն ասաց, որ այստեղ հակասություններ կան:

«Անընդհատ ասում ենք՝ մարդկանց քիչ տուգանենք, մյուս կողմից ասում ենք՝ բերենք այդ շրջիկ մեքենաներն էլ ավելացնենք, որ ավելի շատ տուգանենք»,- ասաց վարչապետը՝ հավելելով, որ խնդիր կա նաև ոստիկանների համազգեստներին ամրացված տեսախցիկների հետ կապված:

Ոստիկանապետը հայտնեց, որ շարժական արագաչափերն այս պահին չեն գործում:

«Մենք քաղաքական խնդիր ենք ձևակերպել, որ  պետք է դադարեցնենք քաղաքացիներին ամեն տեղ բռնել-տուգանելու քաղաքականությունը, հիմա դուք քննարկում եք՝ ավելի շատ ինչպես տուգանենք: Էս ամեն ինչը տեղի է ունեցել, որ պուճուր-պուճուր քայլերով էլի վերադառանանք հին տրամաբանությա՞նը: Չի կարելի այս  տրամաբանությամբ առաջ գնալ»,- ասաց վարչապետը:

Ոստիկանապետը հայտնեց, որ վարչապետի հանձնարարականով շուտով օրինագիծ կներկայացնեն, որտեղ ներառված կլինի տուգանքի չափերի նվազեցման մասին օրինագիծը:

«Դրանք բավականին նվազելու են, հիմա չեմ ուզում առաջ ընկնել»,- ասաց Օսիպյանը:

Վարչապետն էլ ոստիկանապետին հանձնարարեց ներկայացնել վերջին մեկ ամսվա ընթացքում ճանապարհային երթևեկության կանոնների խախտումների վերաբերյալ վիճակագրությունը՝  նախորդ տարվա նույն ժամանակահատվածի համեմատելով:

«Դադարեցնենք քաղաքացիների հետևից ընկնել, որովհետև դա հավելյալ հարկ է քաղաքացիների վրա, երթևեկության անվտանգության խնդիրը ճանապարհների որակով լուծեք, որ մարդը ստիպված չլինի ճանապարհի կենտրոնում անդունդի հանդիպի, որ պտտվի, թռնի ձորը»,- ասաց Նիկոլ Փաշինյանը և հավելեց. «Քաղաքացին տուգանքի մատերիալ չի, և պետական բոլոր մարմինները սա պետք է ընդունեն ի գիտություն»: 

Վարելիյ Օսիպյանն էլ ասաց, որ հարցը պետք է կարգավորել, քանի որ կան վարորդներ, կան քաղաքացիներ, որոնց մոտ անպատժելիության մթնոլորտ է ձևավորվում, ինչը վկայում են  իրենց ուսումնասիրությունները:

«Օրենսդրությունը պետք է կարողանանք այնպես փոխել, որ կանխարգելիչ նպատակ ունենա: Գուցե նախազգուշացումների համակարգ ներդնենք, խնդրում եմ, պահանջում եմ, հրահանգում եմ, հրամայում եմ չմեծացնել քաղաքացիներին տուգանելու առիթներն ու հնարավորությունները», - նշեց Նիկոլ Փաշինյանը:

ՀՀ արդարադատության նախարար Արտակ Զեյնալյանն էլ առաջարկեց, որ ժամանակավոր լուծում տան մինչև մտածեն խնդրի լուծման տարբերակները:

«Եկեք պայմանավորվենք հետևյալը, որ շարժական մեքնենաները դուրս չեն գա ծառայության», - ընդգծեց  վարչապետը՝ հավելելով, որ այս տարբերակով կընդունեն որոշումը, բայց այն բովանդակությունը, որ բարձրաձայնվեց, պետք է բացառվի: