Ձեր վստահելի աղբյուրը

Հայաստանը և Հայաստանի միջազգային գործընկերները հոգնել են ադրբեջանական մամուլում մերթընդմերթ հայտնվող ապատեղեկատվությունից և այդ ապատեղեկատվությունները հերքելուց: Այսօր կայացած ճեպազրույցի ժամանակ հայտարարեց ՀՀ արտաքին գործերի նախարարության մամուլի խոսնակ Տիգրան Բալայանը՝ անդրադառնալով Իսրայելի տարածքային կառավարման նախարար Ցախի Անեգբիի՝ մեր երկիր կատարած այցից հետո ադրբեջանական մամուլի տարածած հակահայ քարոզչությանը:

«Իհարկե, մենք կապ ենք հաստատել իսրայելական կողմի հետ, մեզ ամենաբարձր մակարդակով վստահեցրել են, որ նման հայտարարություն չի արվել և չէր կարող արվել: Սա մոտավորապես այն շարքից է, որ Ադրբեջանը Նախիջևանի հետ սահմանին 11 հազար հա տարածք է իր վերահսկողության տակ վերցրել»,- ասաց Բալայանը:

Հարցին, թե  ԵԱՀԿ Մինսկի խմբի՝ հայաստանյան այցի ընթացքում համանախագահներն արդյոք որևէ կարծիք հայտնել են Արցախը բանակցային սեղան վերադարձնելու հայկական կողմի դիրքորոշմանը՝ ԱԳՆ մամուլի խոսնակը տեղեկացրեց, որ համանախագահների հետ հանդիպման վերաբերյալ հավելյալ տեղեկատվություն տրամադրել չի կարող. «Մեզ համար գերական Արցախի կարգավիճակն է և նրա ժողովրդի անվտանգությունը»։

Իսկ հնարավո՞ր է, որ գեներալի կողմից  բանակին հատկացված միջոցների յուրացումը բացասաբար ազդի Հայաստանի միջազգային վարկի վրա, հետաքրքրվեցին լրագրողները:

«Հայաստանի միջազգային վարկանիշի վրա միայն դրական կարող է անդրադառնալ, որ կոռուպցիան բացահայտվում է, և մեղավորներն իրենց արժանի պատիժն են կրում: Դա միմիայն դրական ընթացք կարող է ունենալ մեր միջազգային վարկանիշի վրա»,- ասաց ԱԳՆ մամուլի խոսնակը:

Անդրադառնալով վերջին շրջանում սահմանին ադրբեջանական զինուժի կուտակումներին և նրան, թե ինչ է անում ԱԳՆ-ն միջազգային հարթակներում՝ կանխարգելելու հնարավոր պատերազմի վերսկսումը՝ Տիգրան Բալայանը շեշտեց, որ ՊՆ-ի գործընկերների հետ սահմանի վիճակի վերջին ճշգրտումները կատարվել են այսօր առավոտյան:

«Երեկ և այսօր ադրբեջանական լրատվամիջոցներով տեղեկատվություն է տարածվել, թե լուրջ մարտեր են ընթանում, զոհեր կան: Այդ ամենը կեղծիք է: Խնդրում եմ հիմնվել միայն մեր ՊՆ-ի պաշտոնական տեղեկատվության վրա»,- ասաց ԱԳՆ ներկայացուցիչը: