Ձեր վստահելի աղբյուրը

«Գիտենք, որ հազարավոր մարդիկ դեռևս համակերպված չեն կուտակային կենսաթոշակային համակարգի հետ, գտնում էին, որ այն պետք էր հետաձգել կամ չպետք էր ներդնել»,- այսօր խորհրդարանում  «Կուտակային կենսաթոշակների մասին» ՀՀ օրենքում լրացումներ կատարելու մասին օրենքի նախագծի քննարկմանն ասաց «Ելք» խմբակցության պատգամավոր Էդմոն Մարուքյանը։

Նա Ֆինանսների նախարար Ատոմ Ջանջուղազյանից հետաքրքրվեց, որ խորհրդարանում այս օրենքի ընդունման դեպքում կառավարությունը դրանով ավարտու՞մ է այս հարցի քննարկումը, թե՞ ոչ, արդյո՞ք չկա էլ անելիք։

«Միայն բավարար կլինի հենց օրենքի առաջին մասը բարձրաձայնել և պարզ կլինի, որ սա այն հայտարարությունն է, որն առնվազն տեղ է թողնում, որ մենք դեռ անդրադառնալու ենք այս օրենքին այլ հավասար պայմաններում, մենք մեր ձեռքերը չենք լվանում, այսինքն՝ մենք համարում ենք, որ դեռ այստեղ անելիք ունենք»,- պատասխանեց Ջանջուղազյանը՝ շեշտելով, որ քննարկումների համար դռները փակված չեն։

Մարուքյանն արձաքանքեց, որ եթե ինչ-որ ֆորմատով խումբ ձևավորվի, հաշվի առնել նաև իրենց ներկայացվածությունը. «Մենք անպայման պետք է մասնակցենք քննարկումներին»։