Ձեր վստահելի աղբյուրը

Կառավարությունը ուժը կորցրած կճանաչի «Բարձրավոլտ էլեկտրացանցեր» ՓԲԸ բաժնետոմսերով հավաստված իրավունքները «Տաշիր-Կապիտալ» ընկերությանը հավատարմագրային կառավարման հանձնելու մասին որոշումը:  Այդ մասին որոշման նախագիծն ընդգրկված է կառավարության հունիսի 21-ի նիստի օրակարգում:

Նշենք, որ «Բարձրավոլտ էլեկտրացանցեր»  ընկերությունը հավատարմագրային կառավարման հանձնելու պայմանագիրը «Տաշիր»-ի հետ կնքվել էր 2017 թվականին:

Այսպիսով, կառավարությունը վաղվա նիստում ուժ կորցրած կճանաչի 2017 թ-ի օգոստոսի 24-ին ընդունված  «Բարձրավոլտ էլեկտրացանցեր» փակ բաժնետիրական ընկերության բաժնետոմսերով հավաստված իրավունքները հավատարմագրային կառավարման հանձնելու մասին» և 2018 թ-ի ապրիլի 12-ին՝ «Բարձրավոլտ էլեկտրացանցեր» ՓԲԸ-ի բաժնետոմսերով հավաստված իրավունքների հավատարմագրային կառավարման ծրագիրը հաստատելու մասին որոշումները:

Հիշեցնենք, որ կառավարության հունիսի 1-ի նիստում վարչապետ Նիկոլ Փաշինյանն անդրադառնալով բարձրավոլտ էլեկտրական ցանցերին՝ նշել էր, որ էներգետիկ ոլորտի 2 հիմնական ցանցերը  չպետք է լինեն նույն սեփականատիրոջ տիրապետության ներքո, և  պետք է շատ արագ առաջիկայում որոշում կայացնեն էլցանցերի հետագա կառավարման մեթոդի մասին: 

ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանն էլ լրագրողների հետ զրույցում ասել էր, որ արդեն որոշումը կայացրել են, «Բարձրավոլտ էլեկտրացանցեր» (ԲԷՑ) ընկերության հավատարմագրային կառավարումը դադարեցված է և այս պահին  այն գտնվում է պետական կառավարման մեջ: Բացի այդ, ըստ նրա,  բավականին շատ միջազգային կազմակերպություններ հետաքրքրված են և պատրաստ են ներդրումներ անել ԲԷՑ-ում: