Ձեր վստահելի աղբյուրը

«Նաիրիտ» գործարանի աշխատակիցները երկար ժամանակ բողոքի ակցիաների միջոցով կարողացան հասնել նրան, որ ստացան տարիների ընթացքում կուտակված իրենց աշխատավարձը։ Սակայն օրենսդրությամբ նախատեսվում է, աշխատավարձի՝ ամեն օրվա ուշացման համար գործատուից բռնագանձել տույժ։ Նրանք այդ տույժերը չեն ստացել։ Նաիրիտցիների փաստաբան Տիգրան Սարգսյանից Panorama.am-ը տեղեկացավ, որ նրանք այդ տույժերը չեն ստացել, քանի որ նրանց առջև պայման է դրված եղել՝ միայն այդ տույժերից հրաժարվելու դեպքում կստանային աշխատավարձի մայր գումարը։

«Նաիրիտցիներին համաձայնագիր էին տվել, որ ստորագրեն՝ հրաժարվելով տույժերը պահանջելուց։ Ինչո՞ւ էին հրաժարվել տույժերից։ Որովհետև իրենց առաջ պայման էին դրել, ասել էին՝ եթե չհրաժարվեք, աշխատավարձի մայր գումարը չենք տա։ Դա Քաղաքացիական օրենսգրքով համարվում է ստրկացուցիչ  գործարք, երբ որ մարդու առաջ պայման են դնում։ Ինքն էլ իր սոցիալական  ծանր վիճակից ելնելով՝ գնում է իր շահերի դեմ, ու գործարք է ստորագրում։ Դրանք օրենսդրության  համաձայն դատական կարգով ենթակա են անվավեր ճանաչման։ Մենք էլ դիմել էինք, որ անվավեր ճանաչեն»,- ասաց փաստաբանը։

Նաիրիտցիները տարբեր խմբերով դիմել էին դատարան։ 18 հոգու գործով ներպետական իրավունքի պաշտպանության բոլոր ատյանները սպառվել են, դիմել են Մարդու իրավունքների եվրոպական դատարան։

«Մեր բողոքարկման հիմքում դրել ենք այն, որ խախտվել է Եվրոպական կոնվենցիայով նախատեսված մեր արդար դատաքննության իրավունքը, այսինքն դատարանն առանց մեզ լսելու՝ արդյո՞ք ունենք լրացուցիչ փաստարկներ, թե ոչ,  հայտարարել  է դատաքննության ավարտ»,- նշեց Տ. Սարգսյանը։

Նա մանրամասնեց, որ առաջին ատյանի դատարանն առանց իրենց լսելու մտել է խորհրդակցական սենյակ, վճիռ է կայացրել ու հրապարկել, մինչդեռ օրենսդրությամբ սահմանված է, որ դատաքննությունը դատարանը կարող է ավարտել միայն այն դեպքում, երբ որ դատավարության մասնակիցներին հարցնում են ՝ լրացուցիչ նյութ ունեն ներկայացնելու, թե ոչ.  «Եթե ասում են ոչ, այդ դեպքում դատարանը կարող է մտնել խորհրդակցական սենյակ։ Առանց մեզ ծանուցելու՝ դատաքննության ավարտ է հայտարարվել, մտել են խորհրդակցական սենյակ։ Վճռի հրապարակման օրվա մասին նույնպես մեզ  չեն հայտնել։ Նույնիսկ դատավորի՝ խորհրդակցական սենյակում գտնվելու ընթացքում իրավունք ունենք նոր նյութեր ներկայացնել և միջնորդել՝ դատաքննության վերսկսում։ Մենք այդ երկու իրավունքներից զրկվել ենք»։

Փաստաբանի խոսքով, եթե դատարանի կողմից  լսվելու իրավունքից զրկվում են, բերում է մարդու իրավունքների եվրոպական կոնվենցիայով նախատեսված արդար դատաքննության իրավունքի խախտման։

«Քանի որ այդ իրավունքը խախտվել է, մենք իրավունք ունեինք դիմել Մարդու իրավունքների եվրոպական դատարան։ Նաիրիտի դատական գործն այսօր գնաց ՄԻԵԴ»,- ասաց Տ. Սարգսյանը։

Նա նաև տեղեկացրեց, որ առաջին ատյանի դատարանի վճիռը բողոքարկել էին վերաքննիչ։ Վերաքննիչ դատարանը գտել էր, որ առաջին ատյանը խախտում չէր կատարել։ Վճռաբեկը բողոքը վարույթ չէր ընդունել։