Ձեր վստահելի աղբյուրը

«Սեքյուրիթի դրիմ» ՍՊԸ հիմնադիր Ալեքսան Զաքարյանը զարմացած է ոստիկանության տարածած հաղորդագրությունից, ըստ որի` «Սեքյուրիթի դրիմ» և Էլլիպս Ջի Էյ» ընկերությունների տնօրինությունը հափշտակել է շուրջ 1 միլիարդ 15 միլիոն 869 հազար 600 հարյուր դրամ:

«Սեքյուրիթի դրիմ» ՍՊԸ հիմնադիր Ալեքսան Զաքարյանը A1plus-ի հետ զրույցում նշել է՝  հասկանում է, թե որն է իր հիմնադրած ընկերությունում ստուգումների շարժառիթը:

«Շարժառիթը կոռուպցիայի դեմ պայքարն  Է ու թիրախավորված մարդկանց ջրի երես հանելն է, որոնցից մեկն էլ երևի Սաշիկն է / Ալեքսանդր Սարգսյան/, որին մեզ հետ կապեցին անհասկանալի պատճառներով: Ընկերության  սեփականատերը ես ու   եղբայրս ենք՝ Գուրգեն Զաքարյանը: Մենք   բազմիցս բարձրաձայնեցինք, որ նրա հետ կապ չունենք, նրան միայն հեռուստացույցով ենք տեսել, ուզեցին, որ մենք լինենք Սաշիկինը ու մեզ «կպցրեցին» Սաշիկին,  ու հիմա դրանով պայմանավորված՝ մենք թիրախ ենք դարձել:  Ի սկզբանե հայտարարվում էր, որ գումարները գնում է Սաշիկին, հիմա այսօր հանրությունն ուզում է դա տեսնել, բայց քանի որ նման բան չկա, բնականաբար սա դառնում Է թյուրիմացության արդյունք»,- ըստ աղբյուրի, ասել է ընկերության հիմնադիրը:

Զաքարյանի խոսքով, ոստիկանության հայտարարած դրամական միջոցները  հենց այն գումարն է, որը 15 ամիսների համար «Սեքյուրիթի դրիմ»-ը վճարել է «Էլլիպս  Ջի Էյ»֊ին տեխնիկական սպասարկման համար:

Հիշեցնենք, ոոստիկանությունը հայտարարել է,  որ  2017թ. փետրվարից 2018թ. հունիս գումար է փոխանցվել չմատուցված ծառայության համար:

Ալեքսան Զաքարյանն առնվազն տարօրինակ է համար նման ձևակերպումն այն պարագայում, երբ իրենց աշխատանքը տեսանելի էր  հանրության  զգալի հատվածի համար,  և ամբողջ այդ ծախսը, ներառյալ աշխատավարձերը, փաստաթղթավորված է:

Ինչ վերաբերում է ծառայությունների որակին` նա հիշեցնում է, որ «Էլլիպս ՋիԷյ» ՍՊ ընկերությունը ստեղծվել է 1989թ-ին` որպես նեղ մասնագիտական կազմակերպություն և մեծ ներդրում ունի  անվտանգության տեխնիկական միջոցների նախագծման, արտադրության, ներմուծման, տեղադրման և սպասարկման ոլորտում:

«Հույս ունենք, որ անաչառ քննությունը ամեն ինչ կպարզի, և ամեն ինչ իր տեղը կընկնի»,- նշել է նա:

Իսկ մինչ այդ Ալեքսան Զաքարյանն ամենայն պատասխանատվությամբ հայտարարում  է. «Որևէ լումա  մենք չենք  յուրացրել»: