Ձեր վստահելի աղբյուրը

Հայաստանում թավշյա հեղափոխությունից հետո Ընտրական օրենսգրքի փոփոխության հարցը, թերևս, ամենասուրն է դրված։ ԸՕ-ի բարեփոխումների անհրաժեշտությունը նախևառաջ պայմանավորված է նոր իշխանություն-ԱԺ մեծամասնություն փոխգործակցության բարդություններով։ Իշխանության  եկած նոր ուժերն արդրացիորեն մտավախություն ունեն, որ ԱԺ մեծամասնություն կազմող ՀՀԿ-ն չի ցանկանա գնալ ԸՕ փոփոխության՝ դրանով իսկ վտանգելով օրենսդիր մարմնում սեփական դիրքերը։

Մյուս կողմից, նույն ՀՀԿ խմբակցությունում իրավիճակն այնքան էլ նախանձելի չէ։  Ակնհայտ է, որ մի շարք պատգամավորների՝ Հանրապետական խմբակցության շարքերը լքելու հանգամանքը ԱԺ-ում տրամադրություններ է փոխել։

Թե ինչպիսին է ստեղծված իրավիճակում արտախորհրդարանական ուժերի դիրքորոշումը՝ ընտրական օրենսդրությունը բարեփոխելու նպատակով վարչապետին առընթեր հանձնաժողով ստեղծելու շուրջ, և որքանով են նույն այդ արտախորհրդարանական ուժերը պատրաստակամ մասնակցելու քննարկումներին, ճշտեցինք նրանցից մի քանիսից։

«Մենք պատրաստ ենք Ընտրական օրենսգրքի բարեփոխումների շուրջ քննարկումներին։ Մասնակցության հրավեր դեռևս չունենք, կամ գուցե ունենք, ես տեղյակ չեմ, բայց մենք միանշանակ կմասնակցենք և մեր առաջարկները կանենք, որպեսզի նախկին ԸՕ-ում տեղ գտած բոլոր արատավոր երևույթներին վերջ դրվի։ Այն, ինչ ունեցել ենք, խայտառակություն էր»,- Panorama.am-ի թղթակցի հետ զրույցում  հայտարարեց «Օրինաց երկիր» կուսակցության փոխնախագահ Հեղինե Բիշարյանը։

Հարցին՝ իսկ ՕԵԿ-ն Ընտրական օրենսգրքի բարեփոխումների հետ կապված առաջարկներ ունի՞, Հեղինե Բիշարյանը դրական պատասխան հնչեցրեց։

«Մենք ունենք առաջարկներ՝ առաջին հերթին կապված ռեյտինգային ընտրակարգի հետ։
Բազմաթիվ նմանատիպ առաջարկություններ կան, պարզապես դրանց կանդրադառնանք քննարկումների ժամանակ։ Նախկինում ևս եղել են կետեր, որոնց հետ համաձայն չենք եղել, այդ խնդիրները մենք կբարձրացնենք»,- ասաց մեր զրուցակիցը։

«Ժառանգություն» կուսակցության փոխնախագահ Արմեն Մարտիրոսյանն էլ իր հերթին տեղեկացրեց, որ այս պահի դրությամբ իրենք ևս քննարկումներին մասնակցելու առաջարկ չեն ստացել, բայց եթե ստանան, անպայման կմասնակցեն։

«ԸՕ-ի շուրջ մեր առաջարկներն արդեն իսկ հրապարակվել են։ 2007 թվականից սկսած՝ «Ժառանգությունը» մասնակցել է ընտրական բոլոր քննարկումներին։ Այժմ, արտախորհրդարանական ուժերին քննարկումների մեջ ներգրավելու նախաձեռնությունը ոչ միայն դրական, այլև անհրաժեշտ եմ գնահատում, որովհետև կան արտախորհրդարանական ուժեր, որոնք անարդարացի կերպով այսօր ԱԺ-ում չեն։ Մեզ և ոչ միայն մեզ եմ նման ուժ համարում»,- նշեց Արմեն Մարտիրոսյանը։

Ինչ վերաբերում է քաղաքագետ Անուշ Սեդրակյանին, ապա վերջինս մեզ հետ զրույցում ընդգծեց, որ իր համոզմամբ՝ ԸՕ-ի շուրջ քննարկումներն առաջին հերթին պետք է ընթանան մամուլում։

«Հրապարակավ կարծիք արտահայտելն այս իրավիճակներում խնդիր չէ։ Միանշանակ, եթե առաջարկ լինի, համար կգտնեմ ներգրավելու քննարկումների մեջ։ Սակայն քննարկումների ձևաչափն ու մասնակիցներին ճշտելուց հետո»,- ամփոփեց մեր զրուցակիցը։

Նշենք, որ ՀՀ վարչապետի որոշմամբ ստեղծվել է ընտրական օրենսդրությունը բարեփոխելու՝ վարչապետին առընթեր հանձնաժողով։ Հատկանշական է, որ  յուրաքանչյուր փոփոխվող դրույթ քննարկվելու ու համաձայնեցվելու է ոչ միայն հասարակական կազմակերպությունների, այլև խորհրդարանական ու արտախորհրդարանական ուժերի հետ։