Ձեր վստահելի աղբյուրը

Երևանի Կարապի լճի հարակից տարածքում մեկնարկել է «Ֆրեսկո» ժամանակակից արվեստի և հոգևոր ֆիլմերի 5-րդ միջազգային փառատոնը: Այս տարի այն անցկացվում է «Ֆրեսկոյի մարդասիրական ուղերձներն աշխարհին» խորագրի ներքո:

Երևանի քաղաքապետարանից հայտնում են, որ այս տարի մասնակցության հազարից ավելի հայտերից ընտրվել է 28 ֆիլմ՝ 13 երկրից, որոնք կպայքարեն 7 անվանակարգերում՝ «Լավագույն ուղերձ՝ հավատ», «Լավագույն ուղերձ՝ հույս», «Լավագույն ուղերձ՝ սեր», «Լավագույն ուղերձ՝ խաղաղություն», «Լավագույն ուղերձ՝ քաջություն», «Լավագույն ուղերձ՝ մարդասիրություն», «Լավագույն ուղերձ՝ հայրենասիրություն»:

Հատկանշական է, որ փառատոնի շրջանակում Կարապի լճի հարակից տարածքում, զուգահեռ դահլիճներում, կանցկացվեն ֆիլմերի դիտում-քննարկումներ, համերգային ծրագրեր, վարպետության դասեր:

«Ֆրեսկո» 5-րդ միջազգային փառատոնն անցկացվելու է մինչև հուլիսի 1-ը:

Փառատոնն իրականացվում է «Ծիածան» հասարակական կազմակերպության և «Ֆորմիկա Փրոդաքշն» ընկերության համատեղ նախաձեռնությամբ՝ Երևանի քաղաքապետարանի և Արարատյան հայրապետական թեմի գործընկերությամբ։