Ձեր վստահելի աղբյուրը

«Հանրապետությունում մեկ միասնական օրենք է գործում, բոլորը անկախ գերատեսչական ենթակայությունից, պետական և մասնավոր լինելուց, ենթակա են լիցենզավորման», - այս մասին այսօր առանց արտոնագրի կրթական գործընթաց իրականացրած դպրոցների թեմայով քննարկման ժամանակ նշեց ԿԳՆ լիցենզավորման գործակալության պետ Մովսես Մովսիսիյանը։
Նա հիշեցրեց, 2007 թվականին Լիցենզավորման մասին օրենքում փոփոխություն եղավ՝ տարրական և նախակրթական ծրագրերը դիտվեցին որպես լիցենզավորման ենթակա գործունեության տեսակ։

«Թե ՊՈԱԿ-ներ, թե մասնավոր դպրոցներ, պարտավոր են օրենքի պահանջով առաջնորդվել, որտեղ հստակ նշված է, որ արգելվում է առանց լիցենզիայի լիցենզավորման ենթական գործունեության տեսակով զբաղվել։ Փոփոխությունից հետո դպրոցները պետք է անցնեին լիցենզավորման գործըթացը։  Ես բոլոր նախարարների ժամանակ առաջարկություններ եմ ներկայացրել՝ շրջաբերականներ ուղարկել ինչպես մարզպետներին, այնպես էլ Երևանի քաղաքապետին։ Առաջարկության հիմքը եղել է այն, որ եթե կան դպրոցներ, որոնք չունեն լիցենզիա, պարտավոր են հայտ ներկայացնել՝ համապատասխան ծրագրերով լիցենզիա ստանալու համար»,- ասաց Մովսիսյանը։

Նա նաև նշեց, որ եղել են լիցենզիա ունեցող միջնակարգ դպրոցներ, որոնք հիմնական դպրոց դառնալուց հետո, պարտավոր էին հիմնական դպրոցի համար ևս վերալիցենզավորման հայտ ներկայացնել։

Մովսես Մովսիսիյանը տեղեկացրեց, որ ԿԳ-ում տեղի է ունեցել նիստ և համապատասխան շրջաբերական է ուղարկվել բոլոր դպրոցներին:

Քննարկմանը ներկա  «Բաց հասարակության հիմնադրամներ – Հայաստան», կրթության ծրագրի պատասխանատու Լիլիթ Նազարյանի կարծիքով՝ լիցենզավորում չունեցող դպրոցները նախորդ կառավարության կողմից թույլ տված անփութության, ամենաթողության արդյունք են։

«Ինձ համար անհասկանալի է այն մոտեցումը, որ նախարարությունը չի իմացել, թե որ դպրոցները լիցենզավորված չեն։ Տարօրինակ է, որ 2007 թվականից մինչև 2018 թվականը համապատասան տեսչությունը չի պարզել, թե որ դպրոցները չունեն լիցենզավորում։ Առաջինը, որ գալիս է մտքիս, տեսչության պահվածքն է, որը պետք է ստուգեր լիցենզավորման առկայությունը: Վստահ եմ, որ 11 տարվա ընթացքում կրթության տեսչությունը հասցրել է մտնել բոլոր դպրոցներ, այս պարագայում ուղղակի եղել է ամենաթողություն», - ասաց նա։

Կրթության փորձագետ Սերոբ խաչատրյանն էլ ավելի շատ ոչ թե դպրոցներին մեղադրեց,  այլ  մարզպետարաններին ու Երևանի քաղաքապետարանին, որոնք ունեն իրավաբանական վարչություն, և նրա խոսքով, ճիշտ կլիներ, որ իրենց ենթակայության տակ գործող դպրոցներին փաթեթով ներկայացնեին լիցենզավորման պրոցեսը։

«Ամեն ինչ սկսվել է նրանից, որ երբ ԿԳ նախարարությունում սկսվեց բարեփոխումների գործընթաց 2009-ից, ու օրինակ, միջնակարգ դպրոցից հաստատությունը հիմնական դպրոց  դարձավ, պարտավոր էր իր լիցենզիան վերաձևակերպել, հակառակ դեպքում, ստացվում է, որ գործունեություն է իրականացնում այլ անվան ներքո:  Հարց է առաջանում ինչպես են ֆինանսավորվել կառավարության կողմից, դասագիրք ստացել դպրոցները, որոնք չլիցենզավորված են»,- նկատեց փորձագետը։

Լիլիթ Նազարյանն էլ հավելեց, որ եթե լիցենզավորման խիստ պահանջ դրվի, շատ դպրոցներ ուղղակի կփակվեն, որովհետև  քչերը կբավարարեն այդ պահանջները, որոնք սահմանված են առողջապահության նախարարության և քաղաքաշինության պետական կոմիտեի կողմից. «Անարդարացի եմ  համարում պատասխանատվությունը միայն դպրոցների վրա թողնելը: Պետական լիազոր մարմինը պետք է հեևողական լիներ»։