Ադրբեջանում քաղաքական բանտարկյալների հարցը կրկին ԵԽԽՎ օրակարգում է
Այսօր Ստրասբուրգում մեկնարկեց Եվրոպայի խորհրդի խորհրդարանական վեհաժողովի ամառային նստաշրջանը, որը կանցկացվի հունիսի 25-ից 29-ը։ Այս նստաշրջանում ևս գլխավոր քննարկման թեմաներից է լինելու Ադրբեջանը, իհարկե ոչ դրական լույսի ներքո։
Այսօր ԵԽԽՎ իրավական հարցերի ու մարդու իրավունքների հանձնաժողովում քննարկվելու է Ադրբեջանում քաղաքական բանտարկյալների վերաբերյալ թեման ու նշանակվելու է զեկուցող։ Բանաձևի առաջարկությունն արվել էր 2018թ․-ի ապրիլին, որի հիման վրա էլ կկազմվի «Քաղաքական բանտարկյալներն Ադրբեջանում» զեկույցը։
Ադրբեջանում քաղաքական բանտարկյալների վերաբերյալ այս զեկույցը կլինի երկրորդը։ 2013թ․-ին Վեհաժողովը մերժեց գերմանացի պատգամավոր Քրիստոֆ Շտրասերի՝ Ադրբեջանում քաղաքական բանտարկյալների վերաբերյալ զեկույցը, ինչն աննախադեպ էր ԵԽԽՎ-ում։ Հետո միայն արդեն փաստական հանգամանքներով պետք է պարզվեր, թե ինչպիսի կոռուպցիոն մեխանիզմներ է գործի դրել Ադրբեջանը՝ զեկույցը տապալելու համար, որն էլ Ադրբեջանի նախագահ Իլհամ Ալիևին իրավունք տվեց ԵԽԽՎ-ում հայտարարել, որ Ադրբեջանում քաղաքական բանտարկյալներ չկան, «ինչն էլ հաստատվել է բանաձևի նախագծի մերժմամբ»։
Այս տարվա հունվարին ԵԽԽՎ-ում ստեղծված Անկախ հետաքննական մարմինը, ի թիվս այլոց, գտել էր, որ ԵԽԽՎ նախկին պատգամավոր Լուկա Վոլոնտեն մեծ դեր է կատարել Շտրասերի զեկույցը տապալելու գործում։ Ավելին, Հետաքննական մարմինը գտել է, որ հիմնավոր հիմքեր կան հավատալու, որ Վոլոնտեն, ադրբեջանցի նախկին պատգամավորներ Սուլեյմանովն ու Մամմադովը զբաղված են եղել կոռուպցիոն բնույթի գործարքներով։
Բանաձևի նախագծի հեղինակները գտնում են, որ Մարդու իրավունքների եվրոպական դատարանի վերջին գործերը պարզ են դարձնում, որ Ադրբեջանում քաղբանտարկյալների թեման իրական է, որի օրինակն է նաև Իլգար Մամմադովի գործը, ում Ադրբեջանը հրաժարվում է ազատ արձակել՝ չնայած ՄԻԵԴ վճռին, որը գտել էր, որ Մամմադովը ձերբակալվել է իշխանություններին քննադատելու համար։ Ուստի, տեղին է, որ գրվի Ադրբեջանում քաղբանտարկյալների մասին նոր զեկույց, որը զերծ կլինի կոռուպցիոն ցանկացած ազդեցությունից։
ԵԽԽՎ-ում այսօր քննարկվելու է նաև 2018թ․-ի ապրիլի 11-ին Ադրբեջանի վաղաժամ նախագահական ընտրություններում ԵԽԽՎ դիտորդական առաքելության վերաբերյալ զեկույցի նախագիծը։
Պարզվում է ԵԽԽՎ նիստերին մասնակցելու համար Ստրասբուրգ է մեկնել նաև Ադրբեջանի պատվիրակության ղեկավար Սամեդ Սեիդովը, ում նկատմամբ ԵԽԽՎ-ն պատժամիջոցներ է կիրառել 2018թ․-ի մայիսին՝ 2 տարի ժամկետով։ Սեիդովը, ով ևս ընդգրկված էր Անկախ հետաքննական մարմնի զեկույցում, զրկվել է ԵԽԽՎ պատգամավորի հիմանական իրավունքներից՝ կազմակերպությունում որևէ պաշտոն զբաղեցնելու, զեկուցող նշանակվելու, անդամ երկրներում ընտրություններ դիտարկելու, վեհաժողովն այլ մարմիններում ներկայացնելու և այլ իրավունքներից: ԵԽԽՎ ղեկավարության կողմից բազմիցս հնչած կոչերին՝ կոռուպցիայի հետ կապվող պատգամավորներին հրաժարվել ԵԽԽՎ անդամությունից, փաստորեն Սեիդովի մոտ արձագանք չեն ստացել։
Այս նստաշրջանի օրակարգում է նաև անդամ երկրներում իրավապաշտպանների պաշտպանության վերաբերյալ զեկույցի նախագիծը, որտեղ ևս քննադատության թիրախում է Ադրբեջանը։
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
