Ձեր վստահելի աղբյուրը

Երևան քաղաքի մետրոպոլիտենի «Հանրապետության Հրապարակ» կայարանի մուտքային համալիրի մոտ այսօր տեղադրվում է Առաջին հանրապետության հիմնադիր Արամ Մանուկյանի արձանը։ Այդ արձանի հետ կապված ամիսներ առաջ բուռն քննարկումներ ծավալվեցին։ Երբ արձանի էսքիզը ներկայացվեց հանրությանը, միանշանակ չընդունվեց. շատ-շատերը չէին հավանել։ Թեև Երևանի քաղաքապետարանից հայտնել էին, որ հուշարձանի նախագծի բաց մրցույթի արդյունքում մրցութային հանձնաժողովը հաղթող է ճանաչել ՀՀ վաստակավոր նկարիչ, քանդակագործ Դավիթ Մինասյանի հեղինակած աշխատանքը, սակայն հանձնաժողովի անդամ, ճարտարապետ Անուշ Տեր-Մինասյանն Panorama.am-ին հայտնել էր, որ   իրենք այդ էսքիզը չեն էլ քննարկել:

Նախօրեին Քաղաքաշինության պետական կոմիտեն հայտարարություն էր տարածել՝ անհրաժեշտ համարելով դադարեցնել Արամ Մանուկյանի արձանի տեղադրման շինարարական աշխատանքները, կազմակերպել համատեղ քննարկում շահագրգիռ գերատեսչությունների հետ և տվյալ համալիրի տարածքում որևէ արձանի տեղադրման նպատակահարմարության հարցը դարձնել հանրային քննարկման առարկա:

Այսօր, երբ սկսվեցին տեղադրման աշխատանքները, կրկին քննարկումներն ակտիվացան։

ՀՅԴ –ական Արթուր Եղիազարյանը ֆեյսբուքյան էջում գրել է. «Պատճառ են բերում, որ խաթարվում է այլ հուշարձան։ Հիմարություն։ Մետրոպոլիտենի «Հանրապետության Հրապարակ» կայարանը շրջապատողը ճարտարապետական արժեք է՞։ Լու՞րջ։ Լա՞վ եք նայել։ Բա չեք տեսե՞լ, որ ի սկզբանե ճարտարապետական սխալ լուծում էր տրված՝ այն կառուցելով կարմիր տուֆով։ Բա փխրուն տուֆից աստիճանահարթակներ են սարքու՞մ։ Չեք տեսե՞լ, որ ոտքի տակ ու ներծծված կեղտից այն քայքայված է արդեն, վաղուց դարձել անհրապույր։ Ասես հրաբխային ինչ որ քայքայված տեղանք լինի, կամ ժանգոտած խողովակների կույտ, այլ ոչ թե ճարտարապետական կառույց։ Հետևի կողմի մասին էլ չասեմ, թե ինչ գարշելի տեսք ունի, երբ նայում ես Կառավարական թիվ 3 շենքից ...

Մեծերը մոռացել են, իսկ երիտասարդները չգիտեն, որ երբ 1981 թվականի դեկտեմբերի 26-ին բացվեց մետրոպոլիտենի «Լենինի Հրապարակ» կայարանը՝ մեծ դժգոհություն կար այդ կայարանի արտաքին կողմի անհրապույր տեսքից ...
Հազիվ այդ տարածքը կարող էր Արամ Մանուկյանի հուշակոթողով որոշակի տեսք ստանալ, այն էլ՝ ուզում են դադարեցնել .. »։

Panorama.am-ը ճարտրապետներ Սաշուր Քալաշյանից ու Հրաչյա Պողոսյանից հետաքրքրվեց, թե իրենք ի՞նչ կարծիք ունեն  համալիրի տարածքի ճարտարապետական լուծման մասին։ Նշենք, որ համալիրի հեղինակներն են Ջիմ Թորոսյանը և Մկրտիչ Մինասյանը։

Սաշուր Քալաշյանն ընդգծեց, որ այդ համալիրը ճարտարապետական ավարտուն կերպար ունի, ձևափոխման անհրաժեշտություն չուներ, այլ տեղ պետք է կանգնեցնեին այդ արձանը։

Հրաչյա Պողոսյանը նույնպես այն կարծիքին է, որ այդտեղ արձանի տեղ չէր. «Տարօրինակ տեղ է այդտեղ։ Եթե այսօրվա քանդակագործության տենդենցներին նայենք, կարող է այդպիսի բան լինել, բայց դա կլասիկ արձանի տեղ չէ։
Արձանի համար հարկավոր էր տեղ գտնել, ոչ թե աստիճանների վրա պատահական տեղ դնել։ Այդ աստիճանները, այդ տարածքը ճարտարապետական ավարտված շինություններ են»։

Ճարտարապետի խոսքով, այդ կառույցն ամբողջովին շատ գեղեցիկ է, ուղղակի քարը քայքայվել է, հարկավոր է վերանորոգել։