Ձեր վստահելի աղբյուրը

«Առաջիկայում կայանալիք ԴիջիԹեք բիզնես ֆորումը Հայաստանում անցկացվում է արդեն 11-րդ անգամ: Սա միակ հարթակն է, ուր ՏՏ ընկերությունները կարողանում են շփվել բիզնեսի հետ, ներկայացնել իրենց լուծումները, միաժամանակ բիզնեսը կարողանում է մեկ հարթակում տեսնել առկա լուծումները»,- այսօր կայացած մամուլի ասուլիսի ժամանակ ասաց Առաջատար տեխնոլոգիաների ձեռնարկությունների միության նախագահ Ալեքսանդր Եսայանը՝ հավելելով, որ այս տարի Դիջիթեք բիզնես ֆորումը տևելու է երկու օր՝ հունիսի 29-ից 30-ը:

«Ունենալու ենք ռազմաարդյունաբերության հետ կապված փակ քննարկում: Հրավիրել ենք Պաշտպանության նախարարին  և տարբեր շահագրգիռ կողմերի, որպեսզի լուծումներ ունեցող հայկական ընկերությունները ցուցադրեն դրանք»,- ասաց նա:

Ասուլիսին ներկա միության գործադիր տնօրեն Կարեն Վարդանյանն իր հերթին նշեց, որ իրենք ՀՀ վարչապետին առաջարկել են ստեղծել մի կոմիտե, որը կզբաղվի երկրի տեխնոլոգիական մոդեռնիզացիայով:

«Սա վերաբերելու է և ռազմաարդյունաբերությանը, և մեր ընկերություններին, և ենթակառուցվածքներին, և կրթությանը, այսինք՝ համալիր մոտեցում տեխնոլոգիական մեդեռնիզացիային: Այն ժամանակ սա միայն գաղափար էր, որն այս ֆորումի ժամանակ որոշում կայացվեց զարգացնել»,- ասաց բանախոսը:

ՀՀ Տնտեսական զարգացման և ներդրումների նախարարի տեղակալ Ավագ Ավանեսյանն էլ նկատեց, որ բարձր տեխնոլոգիաները կառավարության  ծրագրում  առանցքային հենասյուն են. «Այս ոլորտին պետք է շատ լուրջ մոտենանք, հասկանանք թե ինչ կառուցվածքային լուծումներ կան: ՏՏ ոլորտը չափազանց կարևոր է՝ որպես տնտեսության գիտելիքահեն հենասյուն: Սա մեր երկրում  ամենաարագ աճող ճյուղն է: Մեզ մոտ ընկերությունների զգալի մասը ստեղծվել են վերջին երեք տարիներին»,- ասաց փոխնախարարը:  

Ինչ վերաբերում է տեղեկատվական անվտանգության փորձագետ Ռուբեն Մուրադյանին, ապա վերջինիս հատկապես շեշտադրում կատարեց ինֆորմացիոն արտահոսքերի վրա:

«Երկու տարի առաջ Հայաստանը  շատ լուրջ հարված ստացավ կրիպտովիրուսներից, անցած տարի խնդիրներ էին առաջացել բանկային համակարգում: Մենք պետք է հասկանանք ինչպես կազմակերպել կիբերանվտանգության համայնքի համագործակցությունը բիզնեսի և պետական կառույցների հետ»,- ասաց բանախոսը: