Ձեր վստահելի աղբյուրը

ՀՀ ազգային վիճակագրական ծառայության հրապարակած տվյալների համաձայն, 2018 թվականի հունվար-մայիսին Հայաստանում արտադրվել է 3 237.7 մլն կՎտ ժամ էլեկտրաէներգիա՝ նախորդ տարվա նույն ժամանակահատվածի համեմատ պահպանելով նույն մակարդակը: Նախորդ տարվա հունվար-մայիսին արտադրվել է 3 239.3 մլն կՎտ ժամ:

Ըստ ԱՎԾ-ի՝  այս տարվա 5 ամիսներին ՋԷԿ-երի արտադրության ծավալը նվազել է  2.9%-ով և կազմել 1 131.6 մլն կՎտ ժամ, իսկ հողմային էլեկտրակայանների կողմից արտադրվել է 0.9 մլն կՎտ ժամ էլեկտրաէներգիա՝ նախորդ տարվա հունվար-մայիսի համեմատ նվազելով 18.2%-ով:

Ինչ վերաբերում է ՀԷԿ-երին, ապա արտադրության ծավալներն այստեղ աճել են 3.3%-ով՝  կազմելով 963.6 մլն կՎտ ժամ, իսկ Հայաստանի ատոմային էլեկտրական կայանն (ՀԱԷԿ) արտադրել է 1 140.1 մլն կՎտ ժամ էլեկտրաէներգիա, ինչը 2017թ-ի նույն ժամանակահատվածի համեմատ աճել է 0.1%-ով:

Ջերմային կայաններում ևս արտադրության ծավալներն ավելացել են 24.6%-ով՝ կազմելով  22.8  հազար հեգաջոուլ:

Նշենք նաև, որ այս տարվա հունվար-մայիսին հանրապետությունում արևային էլեկտրակայաններն արտադրել են  1.5 մլն կՎտ ժամ էլեկտրաէներգիա։