Ձեր վստահելի աղբյուրը

ՀՀ խորհրդարանական պատվիրակության այցը Բուլղարիա ամուր հիմք կհանդիսանա երկկողմ քաղաքական, առևտրատնտեսական, մշակութային ոլորտներում համագործակցության հետագա զարգացման համար: Այսօր լրագրողների հետ հանդիպմանն ասաց ԱԺ Հայաստան-Բուլղարիա բարեկամական խմբի ղեկավար, ՀՀԿ-ական պատգամավոր Ջեմմա Բաղդասարյանը:

Նա մանրամասնեց, որ այցի ընթացքում տեղի է ունեցել նաև երկու երկրների բարեկամական խմբերի հանդիպումը, որի ընթացքում կարևորվել է համագործակցության տարբեր ոլորտներում կոնկրետ ծրագրերի իրականացման անհրաժեշտությունը:

«Առանձին անդրադարձ է եղել Բուլղարիայի ջանքերին՝  երկկողմ հարաբերությունների ամրապնդման ուղղությամբ՝ և շնորհակալություն ենք հայտնել նրանց խորհրդարանին՝ ԲՀ ՀՀ-ԵՄ Համապարփակ և ընդլայնված գործընկերության համաձայնագիրը վավերացնելու համար»,- ասաց Ջեմմա Բաղդասարյանը:

Հայկական պատվիրակության ղեկավարն ընդգծեց, որ շատ ոլորտներում Հայաստանը Բուլղարիայից տասը տարով առաջ է:

Ասուլիսին ներկա խմբի անդամ, «Ելք» Խմբակցության պատգամավոր Արամ Սարգսյանը նշեց, որ այցի ընթացքում  քննարկվել են քաղաքական կապերի զարգացմանը, միջազգային կազմակերպություններում փոխաջակցությանը, տնտեսական բնագավառում ենթակառուցվածքային նախագծերի իրականացմանը, ապրանքաշրջանառության ծավալների ավելացմանը, ապակենտրոնացված համագործակցությանը, հայ համայնքի կառույցների հետ բուլղար պատգամավորների կապերի ընդլայնմանն առնչվող հարցեր:

«Այցելությունը շատ կազմակերպված էր: Այս այցը նաև ճանաչողական էր, թե եվրոպական ընտանիքի անդամ դառնալու ճանապարհին իրենք ինչ են արել, մենք ինչ ենք արել»,- ասաց պատգամավորը:

Արամ Սարգսյանը վերահաստատեց Ջեմմա Բաղդասարյանի այն տեսակետը, որ Հայաստանը տասը տարի առաջ է Բուլղարիայից թե սահմանադրական, թե արդյունաբերության, թե գյուղատնտեսության, թե էներգետիկ ոլորտների առումով:

Սակայն պատգամավորը նշեց, որ կան հարցեր, որոնցից Հայաստանը կարող է օրինակ վերցնել, օրինակ ԵՄ-ի հետ աշխատելու առումով՝ հատկապես տնտեսական հարցերով:

Ինչ վերաբերում է Բուլղարիայի հայ համայնքին, նա ասաց, որ համայնքը շատ լավ է պահպանել իր ինքնությունը, տեսակը. «Նրանք շատ հարգված էին, նրանց տեսակետը միշտ հաշվի է առնվում, փոքրաթիվ լինելով՝ ազդում են ընտրությունների համար»:

Արամ Սարգսյանը նշեց, որ այնտեղ հանրային հետաքրքրության հարց էր նաև Հայաստանում կաթողիկոսի հետ կապված խնդիրը. «Հիմնականում հայ համայնքի ներկայացուցիչներն ասում են, որ իրենք իրենց թոռնիկներին, ծոռնիկներին դաստիարակում են հայ քրիստոնեայի ոգով, և այն ինչ-որ կատարվում է Էջմիածնում կաթողիկոսի հետ կապված, իրենք համարում են սխալ, համարում են, որ Հայաստանի իշխանություններն էլ պիտի իրենց ջանքերը ներդնեն՝ թույլ չտալու հոգևոր կյանքում նման դրսևորումներ ու ընդզվումներ: Բնականաբար, մենք չենք կարող միջամտել դրան, բայց ես բարձրաձայնեցի հիմա այս մասին, որ այսպիսի տեսակետներ ու մոտեցումներ կան հնաբնակ հայ համայնքի մոտ»:

ԱԺ Հայաստան-Բուլղարիա բարեկամական խմբի անդամ Միհրան Հակոբյանն էլ հավելեց, որ Բուլղարիան Հայաստանի համար կարևոր նշանակություն ունի, և այս առումով թե խորհրդարանական, թե պաշտոնական դիվանագիտական խողովակներով պետք ամրացնել կապերը: