Ձեր վստահելի աղբյուրը

«Հույս ունեմ, որ Շվեդիայի խորհրդարանը հնարավորինս սեղմ ժամկետում կվավերացնի ՀՀ-ԵՄ համաձայնագիրը, ինչը լրացուցիչ ազդակ կլինի երկկողմ կապերի առավել  խորացման համար»: Այս մասին հայտնել է ԱԺ նախագահ Արա Բաբլոյանը ՀՀ-ում Շվեդիայի Թագավորության արտակարգ և լիազոր դեսպան Մարտինա Քուիկիի հետ հանդիպմանը:

ԱԺ լրատվության ու հանրության հետ կապերի վարչության փոխանցմամբ, դեսպանը վստահեցրել է, որ իր երկրի խորհրդարանը չի ուշացնի Հայաստան-Եվրամիություն Համապարփակ և ընդլայնված գործընկերության համաձայնագրի վավերացումը:

Խորհրդարանի ղեկավարը, անդրադառնալով Լեռնային Ղարաբաղի  հակամարտության խաղաղ կարգավորման գործընթացին, նշել է, որ Հայաստանը բարձր է գնահատում հակամարտության լուծման հարցում Շվեդիայի հավասարակշռված դիրքորոշումը:

ԱԺ նախագահը, խոսելով Հայաստանում տեղի ունեցած վերջին զարգացումների մասին, համոզմունք  է հայտնել, որ դրանք կնպաստեն երկու ժողովուրդների միջև  հարաբերությունների հետագա  ընդլայնմանը:

Մարտինա Քուիկը, շնորհակալություն հայտնելով համատեղ աշխատանքի համար, ևս կարևորել է երկկողմ կապերի ամրապնդումը, միջխորհրդարանական փոխգործակցության ակտիվացումը: Նա նշել է, որ Շվեդիան արժևորում է Հայաստանի հետ տարբեր ոլորտներում համագործակցության ընդլայնումը:

Անդրադառնալով Հայաստանի ներքաղաքական զարգացումներին` նա կարծիք է հայտնել, որ ժողովրդավարության հետագա խորացումը դրական ազդեցություն կունենա երկրի զարգացման հարցում: