Ձեր վստահելի աղբյուրը

«Որոշ տնօրեններ իրենց թույլատրված սահմաններից ավելի աշակերտներ են փորձում ընդունել առաջին դասարաններ։ Ակնհայտ է, որ սա համակարգային խնդիր է»,-ֆեյսբուքի իր էջում ուղիղ եթերի ժամանակ ասել է ՀՀ կրթության և գիտության նախարար Արայիկ Հարությունյանը։ 

«Հաջորդ տարվանից ունենալու ենք համակարգային լուծում, այն է, այլևս որևէ տնօրեն առնչություն չի ունենա առաջին դասարանցիների ընդունելության հետ։ Այսինքն՝ կլինի առցանց համակարգ, կայք, որտեղ սեպտեմբերից առաջին դասարան հաճախող երեխայի ծնողը կմտնի տվյալ կայք, կբացի տվյալ դպրոցի էջը, և այնտեղ գրված կլինի՝ որքան թափուր տեղ կա առաջին դասարանցիների համար։ Դիցուք՝ կլինի 38 տեղ, ծնողն իր և երեխայի անունները կլրացնի, այունհետև տնօրենները կիրականացնեն ընդունելությունը։

Երբ որ տեղերը լրանան, այլևս որև մեկը՝ ոչ տնօրնը, ոչ ծնողը, չեն կարաղանա այդ թիվը գերազանցել և ավել աշակերտներ գրանցել։ Այդ կայքը գրեթե պատրաստ է, հիմա իրավական հիմք կնախապատրաստենք և արդեն հաջորդ տարի ծնողները շատ հանգիստ կգրանցեն իրենց երեխաներին։ Այսինքն՝ դպրոցը չի գերազնցի իրեն տրված հնարավորությունները, կբացառվեն կոռուպցիոն ռիսկերը»,- ասել է ԿԳ նախարարը։

Արայիկ Հարությունյանի խոսքով, այն ծնողները, որոնք չեն կարողանա ինքնուրույն էլեկտրոնային գրանցում իրականացնել, կարող են մոտենալ հատուկ կենտրոններ, որտեղ էլ նրանց այդ հարցում կօգնեն։