Ձեր վստահելի աղբյուրը

«Չեմ կարծում, որ ներկա քաղաքական իրավիճակում և Թուրքիայում նախընտրական հռետորաբանությունից հետո կարելի է որևիցե զարգացում ակնկալել հայ-թուրքական հարաբերություններում»,-այսօր կայացած մամուլի ասուլիսի ժամանակ ասաց ԱԳՆ մամուլի խոսնակ Տիգրան Բալայանը:

Ինչ վերաբերում է հարցին՝ արդյոք Հայաստանը կշնորհավորի ընտրություններում հաղթանակած Էրդողանին, բանախոսը հիշեցրեց, որ մինչև 2014 թվականը Հայաստանը և Թուրքիան ազգային տոների կապակցությամբ ֆորմալ առումով շնորհավորական ուղերձներ էին փոխանակում, բայց Էրդողանի՝ այդ երկրի նախագահ դառնալուց հետո այդ պրակտիկան դադարեցվել է:

Անդրադառնալով Արցախյան հիմնախնդրի կարգավորմանը՝ մասնավորապես  վերջին օրերին Նախիջևանի հետ սահմանում Ադրբեջանի սադրիչ գործողություններին՝ Բալայանը շեշտեց, որ Հայաստանի արտասահմանյան գործընկերները բավականին օպերատիվ կերպով տեղեկացվել են:

Ինչ վերաբերում է շրջանառվող տեսակետին՝ ճիշտ չի՞ լինի, եթե Հայաստանը խնդրի ՀԱՊԿ զորամիավորումներ տեղակայել հայ-ադրբեջանական սահմանին, ԱԳՆ ներկայացուցիչը պատասխանեց.

«Ես չեմ կարծում, որ Հայաստանի զինված ուժերն աջակցության կարիք ունեն Նախիջևանյան հատվածում լիակատար վերահսկողությունը պահպանելու հարցում, և մենք կարիք ունենք այլ երկրի զորամիավորում տեղակայել այդ հատվածում: Մեր սահմանների պաշտպանության հանձնառությունը դրված է ՀՀ զինված ուժերի վրա: Վերջին օրերի  զարգացումները ցույց տվեցին, որ մենք վստահությամբ և բավականին արդյունավետ կերպով դա իրականացնում ենք»։

Հարցին՝ ինչ գործողությունների է դիմում հայկական կողմն այն դեպքում, երբ Ադրբեջանն առանց զգուշացման խոշոր զորավարժություններ է անցկացնում, Տիգրան Բալայանը նշեց, որ Հայաստանը տարիներ ի վեր կիրառում է օտարերկրյա պատկան մարմիններին այդ մասին զգուշացնելու պրակտիկան:

«Սա մտահոգվելու առիթ պետք է տա ոչ միայն Հայաստանին, այլև բոլոր գործընկերներին, որոնք հանձնառու են և ստանձնել են համապատասխան պարտավորություններ: Սա Ադրբեջանի՝ միջազգային հարաբերություններում անպատասխանատու խաղացող լինելու հերթական վկայությունն է»,- ասաց նա:

Ինչ վերաբերում է վերջին օրերին Լելե Թեփեի բարձունք այցելած և ադրբեջանամետ հայտարարություններ արած ռուս հայտնի փորձագետներին՝ Տիգրան Բալայանը նման հարցադրում կատարեց. «Կարծում եք՝ Ադրբեջանի հաշվին ճամփորդած ռուս փորձագետներն այլ հայտարարություննե՞ր պետք է անեին: Պարզ է, որ այդ ամենը բեմականացված ներկայացում էր, որի նպատակը հենց այդ հայտարարություններն էին: Արցախյան հիմնահարցի և Հայաստանի հետ հարաբերությունների առնչությամբ Ռուսաստանի դիրքորոշումը հայտնի է բոլոր մակարդակներով: Շոուն տապալվեց, պարզ էր, որ ռուս  փորձագետներն այլ տիպի հայտարարություն չէին կարող անել»: