Ձեր վստահելի աղբյուրը

Հանրապետությունում աղիքային վարակների ակտիվություն է նկատվում, որի թիրախը հիմնականում մինչև տասը տարեկան երեխաներն են:  Այսօր լրագրողների հետ հանդիպմանը հայտնեց ՀՀ ԱՆ հիվանդությունների վերահսկման և կանխարգելման ազգային կենտրոնի հատուկ վտանգավոր և օդակաթիլային վարակների բաժնի պետ Լիանա Թորոսյանը:

Նրա խոսքով՝  ակտիվությունն ակնհայտ է հատկապես հունիս ամսվանից սկսած. «Զգալի աճ է նկատվում անցած տարվա մայիս, հունիս ամիսների համեմատ: Հունիս ամսին նկատվում է  նաև դիզենտերիայի ակտիվացում, որն ավելի շատ բնորոշ է սննդային գործոնին։ Սակայն հանրապետությունում որևէ տեղ հիվանդությունների կենտրոնացված դեպքեր չկան: Եթե հիվանդությունը պայմանավորված լիներ ջրային գործոնով, ապա կարճ ժամանակահատվածում մենք կունենայինք հարյուրավոր դեպքեր: Հիվանդության դեպքերը սփռված են հատկապես Երևանի տարածքով մեկ։

Ինչ վերաբերում է էնտերովիրուսներին՝ մասնագետը նշեց, որ բոլոր հիվանդանոցներում ակտիվ նմուշառումներ են կատարվում դրանց և հայտնաբերվում են եզակի դեպքեր:
Լիանա Թորոսյանը նշեց նաև, որ դեկորատիվ լողավազաններում լողալը կարող է բազմաթիվ հիվանդությունների առաջացման պատճառ դառնալ՝  աղիքային վարակների, ինչպես նաև էնտերովիրուսների։ Նա ծնողներին խորհուրդ տվեց արգելել երեխաներին լողալ ոչ թույլատրելի վայրերում. «Դեկորատիվ ջրավազաններում կարող են լողալ նաև թափառող կենդանիներ, կրծողներ, ինչը մեծ վտանգներ է պարունակում: Մեր բալիկների լողը պետք է կազմակերպել այն վայրերում, որտեղ թույլատրվում է լողալ»։

Նա հորդորեց նաև ժամը 12-ից հետո տնից դուրս չգալ, քանի որ ուլտրամանուշակագույն ճառագայթները վնաս են հասցնում մաշկին, քրտնարտադրության միջոցով էլ կորցնում ենք հեղուկ, հանքային աղեր. «Տնից դուրս գալիս անպայման ունեցեք գլխարկներ, հեղուկ: Տաք եղանակին զովացնում են նաև թանն ու ոչ շատ տաք և  քաղցր թեյերը»։

Հանդիպմանը ներկա «Նորք» ինֆեկցիոն կլինիկական հիվանդանոցի 1-ին բաժանմունքի վարիչ, մանկաբույժ-ինֆեկցիոնիստ Հռիփսիմե Ապրեսյանը նշեց, որ «Նորք» ինֆեկցիոն կլինիկական հիվանդանոցում, աղիքային վարակներով պայմանավորված հիվանդների քանակը 25 տոկոսով ավելացել է:

«Հոսպիտալացվածների 80 տոկոսը հիմնականում երեխաներ են,  ովքեր բուժհաստատություն են դիմում տենդ և փորլուծություն ախտանիշներով: Հսպիտալացված երեխաների վիճակն ընդունման պահին միջին ծանրության կամ ծանր է գնահատվում, և սովորաբար 2-3 օրվա ընթացքում դուրս գալով ծանր վիճակից՝ նրանց մեծամասնությունը շարունակում է  բուժում ընդունել ցերեկային ստացիոնար պայմաններում»,- ասաց մանկաբույժ-ինֆեկցիոնիստը։
Մասնագետը ծնողներին հորդորեց դիմել մանկաբույժի, եթե երեխայի մոտ  նկատում են փսխումներ, փորլուծություն  և ջերմության բարձրացում:

«Առաջինը պետք է իրազեկել երեխայի մանկաբույժին: Մինչ մանկաբույժի զննելը անհրաժեշտ է մեծացնել երեխային տրվող հեղուկների ծավալը: Պետք է հեղուկները խմել շատ, բայց փոքր չափաբաժնով և հաճախակի»,-ասաց մասնագետը: