Ձեր վստահելի աղբյուրը

ՀՀԿ-ն առաջարկում է տեխնիկական սարքերով ընտրողների գրանցումն իրականացնել միմիայն նույնականացման քարտերի միջոցով:

«Քանի որ այդ սարքերը հնարավորություն ունեն չիպ ընթերցելու, եկեք օգտագործենք այս առիթը, մասսայաբար ID քարտեր տրամադրենք, դա բարձրացնելու է որակը»,- ԱԺ-ում այսօր ասաց ՀՀԿ ներկայացուցի Դավիթ Հարությունյանը` հավելելով, թե տեղին չէ այն մտահոգությունը, որ հնարավոր չէ կարճ ժամկետներում ID քարտեր տրամադրել։ Գործընթացը, ըստ նրա, կարելի է շատա արագ կազմակերպել:

Քննարկմանը ներկա «Ելք» խմբակցության պատգամավոր Էդմոն Մարուքյանը հարցրեց Հարությունյանին՝  որքա՞ն գումար և ժամանակ է պետք ամբողջ բնակչությանը ID քարտ տալու համար:

Վերջինս պատասխանեց, որ երբ ինքն աշխատում էր կառավարությունում, հայտարարվել էր նոր մրցույթ, սակայն հիմա տեղյակ չէ` այդ գործընթացն ինչ փուլում է:

Դավիթ Հարությունյանը նաև հիշեցրեց, որ Եվրամիությունը ժամանակին  պատրաստակամություն էր հայտնել այս հարցում գումարային աջակցություն ցուցաբերել Հայաստանին:
«Բացի այդ` ցանկացած արտահերթ ընտրությունների հետ կապված կունենանք դոնորներ, որոնք անպայման կաջակցեն ID քարտեր տրամադրելուն։ Պետք է պահն օգտագործել և ID քարտեր տրամադրել բոլորին, թեկուզ անվճար: Եթե կառավարությունը կասի օգտագործեք պահը` օգտագործենք, եթե ոչ` չօգտագործենք»,- նշեց ՀՀԿ ներկայացուցիչը։

«Ծառուկյան» դաշինքի պատգամավոր Սերգեյ Բագրատյանն իր հերթին նկատեց, որ այս պահին հնարավոր է ամսական 20 հազար ID քարտեր տամադրել։
Դավիթ Հարությունյանն ի պատասխան նկատեց, որ խոսքը եղածի մասին չէ, նոր որակ ապահովելն է կարևոր։

Բագրատյանը շեշտեց, որ ինքն ամենևին մեղադրելու մտադրություն չուներ, միաժաանակ հարց ուղղելով՝ ինչո՞ւ նախորդ ընտրությունների ժամանակ այս ամբողջ գործընթացը չիրականացվեց։
«Ավելի ուշ ենք հանգել այս մտքին: Մի ընկերություն կար, որից դժգոհ ենք, մենք ուզում ենք նոր նմուշի ID քարտ, և հիմա սա պատմական շանս է։ Սա գաղափար է, որ նվեր է տրվում կառավարությանը»,- ասաց ՀՀԿ ներկայացուցիչը։