Ձեր վստահելի աղբյուրը

Հայտնի կոմպոզիտոր Արամ Խաչատրյանն իր համերգային գործունեության ընթացքում հյուրախաղերով հանդես է եկել աշխարհի բազմաթիվ երկրներում: Այդ շրջագայություններն ուղեկցվել են բազմաթիվ հետաքրքիր հանդիպումներով, հետաքրքրաշարժ պատմություններով, նշանավոր մարդկանց հետ հանդիպումներով, օրինակ՝ Չարլին Չապլին, Էռնեստ Հեմինգուեյ, Հռոմի պապ և ուրիշներ։ Այդ ամենը մեկ էքսկուրսիայի ժամանակ դժվար է ներկայացնել, այդ բացը  լրացնելու համար  թանգարանը մշակել է  կրթական ծրագիր՝ «Ճամփորդենք Խաչատրյանի հետ»։ Ծրագիրը ներկայացված է ինտերակտիվ քարտեզի և բջջային հավելվածի տարբերակով:

Panorama.am-ին թանգարանի ցուցադրությունների կազմակերպման և հանրահռչակման բաժնի վարիչ Աննա Ասոյանն ասաց, որ ծրագրի նպատակն է ստեղծել մի այնպիսի հարթակ, որը կներկայացնի Ա. Խաչատրյանի համերգային շրջագայություններով այցելած երկրների քարտեզագրությունը,  տեղեկություն կտա նշված երկրներում կայացած Ա. Խաչատրյանի համերգների, նշանավոր մարդկանց հետ ունեցած հանդիպումների մասին, որոնք ուղեկցվել են բազմաթիվ  հետաքրքրաշարժ պատմություններով: Ներկայացված է 12 երկիր, հետագայում, նրա խոսքով, իհարկե, անընդհատ ավելացվելու է նոր երկրներով, ճամփորդություններով։

Ա. Ասոյանը նշեց, որ ծրագիրն առաջին հերթին նախատեսված է 16 տարեկանից բարձր հենաշարժողական խնդիրներ ունեցող անձանց համար. «Թիրախային խմբի ընտրությունը կատարվել է հաշվի առնելով այն հանգամանքը, որ տուն-թանգարանը չունի սոցիալական այս խմբի համար նախատեսված  կրթական ծրագրեր, որը պատճառաբանվում է թեքահարթակների բացակայությամբ, տուն-թանգարանի մուտքի, ինչպես նաև ներսի բազմաթիվ աստիճանավանդակների առկայությամբ, որոնք խոչընդոտում են հենաշարժողական խնդիրներ ունեցողներին տեղաշարժվել թանգարանում։ Քարտեզը ներկայացված է թանգարանի նախասրահում, որպեսզի հենաշարժողական խնդիրներ ունեցող անձիք կարողանան մասնակցել  ծրագրերին»։

Նա նշեց, որ ամբողջ տեղեկատվությունը ներկայացվում է և տեքստերի միջոցով, և աուդիո տարբերակով, ուղեկցվում է լուսանկարներով տվյալ ճամփորդության մասին։ Այսինքն կարող են օգտվել նաև թույլ տեսողություն, վատ լսողություն ունեցող մարդիկ։

Բացի նշված խմբի անձանցից, ծրագրին կարող են մասնակցել նաև բոլոր այն մեծահասակները, որոնք հետաքրքրված կլինեն 20-րդ դարի  մշակութային կյանքով, Ա. Խաչատրյանի համերգային գործունեությամբ: Ծրագիրը նախատեսված է նաև զբոսաշրջիկների համար, ներկայացված է 4 լեզուներով՝ հայերեն, ռուսերեն, անգլերեն, ֆրանսերեն։

Ա. Ասոյանն ասաց, որ ծրագրի առանձնահատկություններից  է՝  այն անհատական է, ինչպես նաև  շարժական է,  և հնարավորություն ունեն ծրագիրը իրականացնել նաև թանգարանից դուրս: