Ձեր վստահելի աղբյուրը

«Եթե կառավարությունն ուզում է առանձին գնալ իր ճանապարհով, ուրեմն ունենալու ենք երկու տարբեր նախագծեր։ Եթե այդ ճանապարհն ենք որդեգրում,  իմամանք՝ ինչ ենք անում։  Իմ կարծիքով, այդ ճանապարհը ճիշտ չէ, պետք է գնալ մեկ նախագծով»,- ԱԺ-ում ընտրական օրենսգրքի շուրջ քննարկումների ժամանակ այսօր ասաց ՀՅԴ խմբակցության ղեկավար Արմեն Ռուստայանը՝ հավելելով, որ ԸՕ-ի շուրջ պետք է լինի մեկ ընդհանուր նախագիծ, որն էլ կուղարկվի Վենետիկի հանձնաժողով և շրջանառության մեջ կդրվի խորհրդարանում։

ՀՀԿ ներկայացուցիչ Վիգեն Սարգսյանն իր հերթին նկատեց, որ Ընտրական օրենսգիրքը քաղաքական փաստաթուղթ է, որն ընդունվել է քաղաքական ուժերի փոխհամաձայնությամբ, բանակցությունների արդյունքում։

«Եթե կառավարությունը կարծում է, որ ունի բավականաչափ ռեսուրս, հնարավորություն՝ իր նախագիծը բերելու ԱԺ, կարծում եմ՝ այլ մոտեցում է։ Սա կարող է արդյունք տալ, բայց ոչ՝ քաղաքական կոնսենսուսի արդյունք։ Հետևաբար կարծում եմ, որ չափազանց կարևոր է այս երկու ձևաչափերի միջև աշխատանքի բաշխումը։ Խորհրդարանական 4 ֆրակցիաներ չեն կարող հենց այնպես, հաճույքի համար հանդիպել, այդ թվում՝ ոչ աշխատնքային օրերին»,- ասաց պաշտպանության նախկին նախարարը։

ՀՀԿ մյուս ներկայացուցիչ, Արդարադատության նախկին նախարար Դավիթ Հարությունյանն էլ հիշեցրեց, որ պայմանավորվել են՝ արտախորհրդարանական ուժերն ԸՕ-ի բարեփոխումների շուրջ իրենց առաջարկները կներկայացնեն աշխատանքային խմբի քարտուղարությանը, ոչ թե անձամբ ներկա կգտնվեն քննարկումներին։

«Մենք պայմանավորվել էինք, որ կլինի մամուլը, բայց երբ խոսքը վերաբերում է «Թրանսփարենսի ինթերնեյշնլին», ապա, հավատացեք, վաղը կարող են 10 այլ ՀԿ-ներ, արտախորհրդարանական ուժեր ևս ցանկանան մասնակցել այս նիստին։ Մեր աշխատանքը անարդյունավետ կդառնա։ Այսօր եկել են, քաղաքավարությունը թույլ չի տալիս ասելու՝ ոչ, բայց առաջարկում եմ այսուհետ սահմանափակվել միայն լրատվամիջոցներով»,- նշեց նա։