Ձեր վստահելի աղբյուրը

Ելնելով Արմավիր մարզի Եղեգնուտ և Արշալույս համայնքներում վերջին շրջանում համայնքապետերի դեմ իրականացվող բողոքի տևական ակցիաներից և ներհամայնքային դժգոհություններից՝ մարզպետ Գագիկ Միրիջանյանը հանդիպում է ունեցել տվյալ համայնքների ղեկավարների հետ: Հանդիպման ընթացքում կողմերը քննարկել են բնակչության կողմից արտահայտած դժգոհությունների դրդապատճառները, համայնքներում ստեղծված լարված իրավիճակն ու դրա լուծման հնարավոր ուղիները:

Մարզպետարանի տեղեկատվության և հասարակայնության հետ կապերի բաժնի հաղորդմամբ, կարևորելով համայնքներում կյանքի բնականոն ռիթմին վերադառնալու անհրաժեշտությունը և համայնքապետարանների գործունեության արդյունավետ կազմակերպումը՝ մարզպետը կոչ է արել համապատասխան համայնքների ղեկավարներին՝ օրինականության շրջանակում միջոցներ ձեռք առնել ստեղծված իրավիճակը հանգուցալուծելու համար:

Արշալույս համայնքի ղեկավար Զարզանդ Գրիգորյանը մարզպետ Գագիկ Միրիջանյանին նախօրեին ներկայացրած գրությամբ հայտնել է, որ միչև օգոստոսի 13-ը կգտնվի արձակուրդում, իսկ վերադառնալու հաջորդ օրը՝ օգոստոսի 14-ին, «Տեղական ինքնակառավարման մասին» ՀՀ օրենքի համապատասխան հոդվածով սահմանված կարգով համայնքի ավագանուն կներկայացնի իր լիազորությունները վաղաժամկետ դադարեցնելու մասին առաջարկ:

Եղեգնուտ համայնքի ղեկավարն էլ մարզպետին  տեղեկացրել է, որ սեփական դիմումի համաձայն իր լիազորությունները վաղաժամկետ դադարեցնելու մասին հարցը քննարկվել է հրավիրված ավագանու արտահերթ նիստում, և ավագանին հարցին դեմ է քվեարկել:

Համայնքում ստեղծված իրավիճակով պայմանավորված՝ Գագիկ Միրիջանյանը համայնքի ավագանուն առաջարկել է իր գործառույթներն իրականացնել բացառապես ՀՀ օրենսդրությամբ սահմանված կարգով՝ կազմելով համապատասխան արձանագրություն:

Նշենք, որ  Եղեգնուտ և Արշալույս համայնքներում վերջին շրջանում համայնքապետերի դեմ իրականացվում էին բողոքի տևական ակցիաներ։ Արշալույս համայնքում  բնակիչներն օրեր առաջ փակել էին միջհամայնքային, ինչպես նաև գյուղ մտնող բոլոր ճանապարհները: Գյուղացիները պահանջում էին  Զարզանդ Գրիգորյանի հրաժարականը: Զարզանդ Գրիգորյանը  Արշալույս համայնքի ղեկավարn է 2008 թվականից։  Նա գեներալ Մանվել Գրիգորյանի եղբորորդին է:

Եղեգնուտ համայնքի  բնակիչները նույնպես ակցիաներ են իրականացրել՝ պահանջելով  համայնքի ղեկավար Ռազմիկ Մարգարյանի հրաժարականը։ Նա 1991թ. Եղեգնուտի համայնքի ղեկավարն է։