Ձեր վստահելի աղբյուրը

Ընտրական օրենսգրքի շուրջ առաջարկները ներկայացնելիս «Ծառուկյան» խմբակցության պատգամավոր Սերգեյ Բագրատյանն այսօր առանձնացրեց միևնույն անձի կողմից մեկից ավելի ընտրողներին օգնելու վերաբերյալ արգելքի սահմանումը։

«Օգնելու ինստիտուտի վերաբերյալ բոլորս գիտենք. նախորդ ընտրություններին օգնելով ընտրել է 79 500 մարդ, այնինչ օգնելու իրական իրավական հիմքով քաղաքացիների թիվը, որոնք ունեն բժշկի տեղեկանք, մի քանի անգամ պակաս է»,-նշեց Բագրատյանը՝ հավելելով, որ անցողիկ ձայնն օգտագործվել է ընտրությունը կեղծելու նպատակներով:

«Ծառուկյան» խմբակցության մյուս պատգամավոր Նաիրա  Զոհրաբյանը հայտնեց, որ ըստ Աշխատանքի և սոցիալական հարցերի նախարարությունից իրեն տրամադրված տվյալների՝ օգնության կարիք ունեցող ընտրողների թիվը մոտ 15 000 է։

Հանրապետական կուսակցության ներկայացուցիչ Դավիթ Հարությունյանը հատկանշական համարեց, որ  «Ծառուկյան» խմբակցությունը նոր բան չի առաջարկել, գործող ԸՕ-ում արդեն իսկ առկա է մեկից ավելի ընտրողի օգնել  թույլ չտալու մասին պահանջը։

«Ցավոք, գյուղական վայրում բազմաթիվ մարդիկ կան, որ ունենալով տեսողական խնդիրներ՝ բժիշկներին չեն այցելում, ակնոց չեն կրում՝ երբեմն նաև ֆինանսական վիճակից ելնելով: Դրա համար եթե կարողացանք, պետք է օգտագործենք մեր առաջարկած սարքերը, որոնք հենց այդ հարցին էլ են պատասխան տալիս»,-ասաց նա:

«Ելք»-ի ներկայացուցիչ Գեորգի Դոխոլյանն էլ շեշտեց, որ նախորդ ընտրություններին այնքան մեծ թվով «օգնողներ» էին գալիս, որ ձանձրացել էին գրանցել վերջիններիս. «Տոտալ գալիս էին՝ օգնող, օգնող, օգնող»:

Սերգեյ Բագրատյանը նշեց, որ բժշկի տեղեկանքի հարցում չեն կարողանում գտնել լավագույն լուծումը. «Միգուցե տեղեկանքի մի ձև գտնենք, որը պոլիկլինիկան կտա քաղաքացուն՝ նրա պահանջի դեպքում։ Այլապես նման տեղեկանք չունեցող ընտրողներին չպետք է օգնելու իրավունք տրվի»։