Ձեր վստահելի աղբյուրը

«Մայր Աթոռ Սուրբ Էջմիածնում պահվող Սուրբ Գեղարդի հետ կապված այն ինչ լսեցինք այս օրերին, դրանք ուղղակի զավեշտալի ու անհիմն են, իսկ կրոնական առումով՝ նույնիսկ դատապարտելի»,- այս մասին այսօր լրագրողների հետ հանդիպմանն ասաց Մայր Աթոռի ձեռագրատան, արխիվի և թանգարանների տնօրեն Տեր Ասողիկ քահանա Կարապետյանը:

Նրա խոսքով՝ մասունքների, սրբությունների հանդեպ նման հանդգնությունը, կասկածների սերմանումը պարզապես սրբապղծություն է, մանավանդ այն անձանց կողմից, որոնք Գեղարդին երբեք չեն առնչվել, անտեղյակ են պատմական այն փաստաթղթերին, վկայություններին, որոնք կան հրապարակում:

«Ցավալին այն է, որ անտեղյակ անձանց կողմից տարածած սուտը և կեղծիքը մոլորության մեջ են գցում մեր հավատացյալներին: Պատմական փաստերը, տեղեկությունները հայտնի են, կան հրապարակված հոդվածներ, կան գիտական հրապարակումներ, մենք թաքցնելու ոչինչ  չունենք, Հայոց եկեղեցին ունի մեկ բուն գեղարդ, և 18-րդ դարի վերջին պատրաստված կրկնօրինակը, որը պատրաստվել է այդ բուն օրինակն այդ ժամանակաշրջանում զուտ հափշտակությունից զերծ պահելու համար, այն օրհնվել է, օծվել և դարձել հավատքի նվիրական առարկա: Ես լսեցի, որ ասում են, իբրև թե, Գեղարդի վրա առկա է չորս կնիք, միանշանակ դա սուտ է, Գեղարդի վրա ի սկզբանե եղել է երկու կնիք և դրանց մասին է վկայում 1800-ականներին պատրաստված փաստաթուղթը», - ասաց Տեր Ասողիկ քահանան:

Լրագրողների հարցին, թե ինչու՞ հիմա եղան Գեղարդի թեմայով շահարկումներ, Մայր Աթոռի ձեռագրատան, արխիվի և թանգարանների տնօրենը պատասխանեց. «Հավանաբար, նրանք մտածեցին, եթե Գեղարդի շուրջ նման կասկածներ սերմանեն, իրենց անհիմն պահանջը ևս առավել կարդարանա: Սակայն այդպիսի կասկածներ սերմանողները պատմական հիմքերին անտեղյակ են»:

Դիտարկմանը, թե ինչո՞ւ երկու գեղարդները միասին չներկայացվեցին ժողովրդին՝ կասկածները վերացնելու համար, նա պատասխանեց. «Իմաստ չկա երկուսը միասին ներկայացնելու, բուն գեղարդը ներկայացվել է, իսկ կրկնօրինակի նկարները սփռված են համացանցում՝ տարբեր ցուցահանդեսներ տարված կատալոգների մեջ: Ցանկացողը կարող է գալ Մայր աթոռ սուրբ Էջմիածին և տեսնել այն: Տարբեր առիթներով արդեն 4 տարի է Գեղարդը դուրս է բերվում, նկարահանվում է և ներկայացվում է հանրությանը: Եվ ամենակարևորը, կան արխիվային հիմքեր, պարզապես պետք է խորամուխ լինել այդ հիմքերի մեջ»: