Ձեր վստահելի աղբյուրը

«Ճիշտ կլինի հանդես գալ Ընտրական օրենսգրքի բարեփոխումների շուրջ մեկ նախագծով։ Այդ մեկ նախագիծը պետք է քննարկել նույն կազմով, որը ի սկզբանե ձևավորվել է։ Մենք ունենք գաղափարներ, որոնք ներկայացնում են տարբեր քաղաքական ուժեր։ Առաջարկներ ստանում ենք նաև արտախորհրդարանական ուժերից։ Այս տրամաբանությամբ մենք գալու-հասնելու ենք  նախագծի»,-ԱԺ-ում Ընտրական օրենսգրքի շուրջ այսօր կայացած քննարկումների ժամանակ ասաց ՀՅԴ խմբակցության պատգամավոր Արմեն Ռուստամյանը։

Քննարկմանը ներկա ընտրական օրենսդրությունը բարեփոխելու՝ վարչապետին առընթեր հանձնաժողովի ղեկավար Դանիել Իոաննիսյանն ի պատասխան նկատեց, որ ընտրական բարեփոխումներն ապահովելու են պատմության մեջ ամենաարդար ընտրությունները։

«Մեր հանձնաժողովը փորձում է պատրաստել փաթեթ, որը կապահովի այդ խոստման իրականացումը։ Մենք դեռևս չենք անցել բուն  նախագծի քննարկմանը, մենք հայեցակարգի մշակման փուլում ենք։ Հայցակարգն ամբողջությամբ պատրաստ չէ։ Երբ հայեցակարգի ամբողջական տեսքը պատրաստ լինի, կներկայացվի հանրության դատին։ Ամեն դեպքում, ակնկալվում է, որ մեր աշխատանքային խումբը նախագիծ պատրաստելու է»,- նշեց նա։

Իոաննիսյանը շեշտեց, որ հայեցակարգի մշակման գործընթացում իրենք լսում  են բոլորի առաջարկները՝ անկախ նրանից՝ ով է ներկայացնում։

«Մենք քննարկում ենք այդ առաջարկները, նայում ենք առաջարկի բովանդակությանը։ Կամ այն ընդունում ենք, կամ ամրագրում մեր հայեցակարգում, կամ հիմնավոր կերպով ասում ենք՝ ոչ, առաջարկն այսինչ պատճառով լավը չէ։  Մեզ համար իրոք տարբերություն  չկա՝ առաջարկ ներկայացնողը խորհրդարանի ներկայացուցիչն է, թե սովորական քաղաքացի։ Մենք պատրաստ ենք լսել բոլոր առաջարկությունները»,- ասաց նա՝ շեշտելով, որ իրենց հանձնաժողովը ոչ թե քաղաքական, այլ մասնագիտական հանձնաժողով է։

«Ծառուկյան դաշինք» խմբակցության պատգամավոր Նաիրա Զոհրաբյանը շեշտեց, որ սիզիպոսյան աշխատանք չանելու համար պետք է համադրել բոլոր կողմերի աշխատանքները։

«Վենետիկի հանձնաժողովը չի ասել, որ քաղաքացի Վարդուշի առաջարկը պետք է համահունչ լինի քաղաքական ուժերի առաջարկին։ Կան կատեգորիկ իրար չհամընկնող տեսակետներ, հիմա կարող է ԱԺ-ում մեծամասնության կոնսենսուսով հաղթի այն տեսակետը, որը չի համընկնում մեր ու ձեր տեսակետի հետ։ Մենք նախագիծ պատրաստենք, ձեր մասնագիտական հանձնաժողովն ասի՝ ինչու եք այսքան աշխատել։ Դրա համար պետք է գտնել իրար հետ աշխատելու ճիշտ և օպտիմալ տարբերակ»,- ասաց Նաիրա Զոհրաբյանը։

ՀՀԿ ներկայացուցիչ Վիգեն Սարգսյանն էլ նկատեց, որ քաղհասարկության կողմից պետության ղեկավարումը շատ տարածված մոլորություն է։

«Եթե դուք պնդում եք, որ ձեր հանձնաժողովը մասնագիտական հանձնաժողով է, ինձ մոտ հարց է առաջանում . ո՞վ է շարադրել ԸՕ-ի քաղաքական պատվերը։ Ինչ եք դուք գրում։ Աշխարհում ընտրական օրենսգրքերի 150 տեսակ կա։ Ո՞ր մեկն եք վերցնում որպես մոդել, ում նախընտրածը, ով է դրա համար ԱԺ-ում քվեարկելու։ Դուք նոր մոդել եք առաջարկում, որն իրականում շատ հիասթափեցնող է։ Ձեր դիրքորոշումը շատ անհասկանելի է, հուսամ՝ դա Ձեր անձնական դիրքորոշումն է, ոչ թե ԸՕ-ի բարեփոխումներով զբաղվող հանձնաժողովինը»,- ասաց պաշտպանության նախկին նախարարը։