Ձեր վստահելի աղբյուրը

Ազգությամբ հայ, բայց ՀՀ քաղաքացի չհանդիսացող երիտասարդները չեն կարող ծառայել ՀՀ զինված ուժերում: Այս մասին այսօր լրագրողների հետ ճեպազրույցում ասաց ՀՀ պաշտպանության նախարարի տեղակալ Գաբրիել Բալայանը:

Նա նշեց, որ ՀՀ Սահմանադրության մեջ  հստակ գրված է`  յուրաքանչյուր քաղաքացի պարտավոր է մասնակցել ՀՀ սահմանների պաշտպանությանը օրենքով սահմանված կարգով. «Այսինքն՝  ազգությամբ հայ, սակայն ՀՀ քաղաքացի չհանդիսացողները չեն կարող զորակոչվել, օրենքով դա արգելվում է»: 

Իսկ եթե ազգությամբ հայերը, այնուամենայնիվ, ցանկանում են ծառայել, ապա, ըստ Գաբրիել Բալայանի, նրանք առաջին հերթին պետք է ընդունեն ՀՀ քաղաքացիություն, դրանից հետո  պետք է անցնեն բոլոր այն փորձաքննությունները, որոնք կատարվում են՝ սկսած զինկոմիսարիատի օղակներից: «Այդ պարագայում,  համապատասխան հանձնաժողովը եզրակացություն կկայացնի նրանց զորակոչելու վերաբերյալ»,- ասաց նա:

Փոխնախարարի խոսքով՝ ՀՀ քաղաքացիությունը ոչ միայն պայման է, այլև առաջնային նախապայման՝ ՀՀ զինված ուժերում ծառայելու համար: